Qazaqstan musylmandary dini basqarmasynyń tóraǵasy Naýryzbai qajy Taǵanuly “Qazaqstan” ulttyq arnasyna orazanyń máni men mańyzy, Ramazan aiynyń qadiri men qasieti jóninde arnaiy suhbat berdi, dep habarlaidy Dalanews.kz.
Suhbat barysynda Bas múfti Ramazan aiynyń ereksheligin atap ótti.
“Ramazan – kúlli musylman álemi úshin qasietti de berekeli ai. Paiǵambarymyz (oǵan Allanyń salaýaty men sálemi bolsyn) Ramazan aiy kirgende adamdardy bylai dep súiinshileitin bolǵan: “Senderge Ramazan aiy keldi, bul berekege toly ai. Alla osy aida orazany paryz etti. Bul aida jánnat esikteri aiqara ashylyp, tozaq esikteri jabylady”. Ata-babalarymyz da bul ai kirisimen bir-birin quttyqtap, balalar úi-úidi súiinshilep: “Muhammed úmbetine aitqan jarapazan, orazań qabyl bolsyn ustaǵan jan!” – dep, jarapazan aitatyn.
Bul aida adamzat balasyn týra jolǵa, bilimdilik pen beibitshilikke úndegen Qasietti Qurannyń alǵashqy aiattary túsken. Bul qasietti aidy kúlli musylman jurtshylyǵy saǵynyp, erekshe qadirlep, asyǵa kútip alady. Alla Taǵalanyń ámirine bas iip, oraza ustap, muqtajdarǵa járdemdesip, taǵat-qulshylyqtar jasap, jan dúniesi rýhani demalady. Alla Taǵala Ramazan aiyndaǵy orazamyzdy, Qadir túnindegi duǵa-tilekterimizdi qabyl etkei! Elimiz aman, jurtymyz tynysh bolǵai! Kelesi Ramazan aiyna aman-esen jetýimizdi Alla násip etsin! Ámin!”, — dedi ol.
