قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى “Qazaqstan” ۇلتتىق ارناسىنا ورازانىڭ ءمانى مەن ماڭىزى، رامازان ايىنىڭ ءقادىرى مەن قاسيەتى جونىندە ارنايى سۇحبات بەردى، دەپ حابارلايدى Dalanews.kz.
سۇحبات بارىسىندا باس ءمۇفتي رامازان ايىنىڭ ەرەكشەلىگىن اتاپ ءوتتى.
“رامازان – كۇللى مۇسىلمان الەمى ءۇشىن قاسيەتتى دە بەرەكەلى اي. پايعامبارىمىز (وعان اللانىڭ سالاۋاتى مەن سالەمى بولسىن) رامازان ايى كىرگەندە ادامداردى بىلاي دەپ سۇيىنشىلەيتىن بولعان: “سەندەرگە رامازان ايى كەلدى، بۇل بەرەكەگە تولى اي. اللا وسى ايدا ورازانى پارىز ەتتى. بۇل ايدا ءجاننات ەسىكتەرى ايقارا اشىلىپ، توزاق ەسىكتەرى جابىلادى”. اتا-بابالارىمىز دا بۇل اي كىرىسىمەن ءبىر-بىرىن قۇتتىقتاپ، بالالار ءۇي-ۇيدى سۇيىنشىلەپ: “مۇحاممەد ۇمبەتىنە ايتقان جاراپازان، ورازاڭ قابىل بولسىن ۇستاعان جان!” – دەپ، جاراپازان ايتاتىن.
بۇل ايدا ادامزات بالاسىن تۋرا جولعا، بىلىمدىلىك پەن بەيبىتشىلىككە ۇندەگەن قاسيەتتى قۇراننىڭ العاشقى اياتتارى تۇسكەن. بۇل قاسيەتتى ايدى كۇللى مۇسىلمان جۇرتشىلىعى ساعىنىپ، ەرەكشە قادىرلەپ، اسىعا كۇتىپ الادى. اللا تاعالانىڭ امىرىنە باس ءيىپ، ورازا ۇستاپ، مۇقتاجدارعا جاردەمدەسىپ، تاعات-قۇلشىلىقتار جاساپ، جان دۇنيەسى رۋحاني دەمالادى. اللا تاعالا رامازان ايىنداعى ورازامىزدى، ءقادىر تۇنىندەگى دۇعا-تىلەكتەرىمىزدى قابىل ەتكەي! ەلىمىز امان، جۇرتىمىز تىنىش بولعاي! كەلەسى رامازان ايىنا امان-ەسەن جەتۋىمىزدى اللا ءناسىپ ەتسىن! ءامين!”، — دەدى ول.
