Bas prokýratýra Qazaqstan fýtbolynda burynǵy federatsiia basshylyǵy Ádilet Barmenqulovtyń kezinde jasalǵan buzýshylyqtardy anyqtady, dep habarlaidy Dalanews.kz.
Qazaqstannyń fýtbol federatsiiasy men birneshe fýtbol klýbtaryna júrgizilgen prokýrorlyq tekserý nátijesinde basqarýdaǵy tiimsizdik pen 3 mlrd teńge kóleminde qarjylyq buzýshylyqtar anyqtaldy.
Negizgi buzýshylyqtar qatarynda negizsiz syiaqylar tóleý, infraqurylym obektilerin salý kezinde qarajatty maqsatsyz paidalaný, sportshylarmen jasalǵan kúmándi kelisimder jáne sportshylardy tamaqtandyrýǵa bólingen qarjyny jymqyrý faktileri bar.
Atap aitqanda, Federatsiianyń burynǵy basshylyǵy jekelegen qyzmetkerler men sportshylarǵa 300 mln teńgeden astam somada negizsiz syiaqy tólegen.
Federatsiianyń ákimshilik ǵimaraty men Talǵar qalasyndaǵy jattyǵý bazasyn salý barysynda is júzinde oryndalmaǵan jumystarǵa 350 mln teńgeden asa tólemder jasalǵan.
2021 jyly bastalǵan Almaty oblysyndaǵy baza qurylysy toqtap tur, al merdigerdiń shottary buǵattalǵan.
Sonymen qatar 135 mln teńge strategiialyq qujattar men standarttardy ázirleýge bólingen qarajattyń oryndy jumsalýy kúmán týdyrady.
Bul qujattarda naqty iske asyrý tetikteri, onyń ishinde jeke investitsiialardy tartý joldary kórsetilmegen, al klýbtardy basqarý standarty is júzinde engizilmegen.
«Ordabasy», «Aqtóbe» jáne «Jetisý» fýtbol klýbtaryndaǵy tekserýler de kelisimshart somalaryn asyryp kórsetý, oiynshylardy tómen baǵamen satý, joǵary baǵamen satyp alý jáne qarajat jymqyrý siiaqty birqatar eleýli buzýshylyqtar anyqtaldy.
Eske salaiyq, buǵan deiin QFF burynǵy basshysy Ádilet Barmenqulov tergeýge ilingenin habarlaǵan edik.
Qarjylyq monitoring agenttigi Qazaqstan fýtbol federatsiiasynyń burynǵy basshysy Ádilet Barmenqulov tergeýge ilingenin rastady.
BAQ tarapynan kelip túsken suranystarǵa bailanysty, QMA Qazaqstan fýtbol federatsiiasynyń buryńǵy basshylyǵyna qatysty sotqa deiingi tergeýdi bastaǵanyn rastady.
Barlyq tergeý áreketteri zańnama talaptaryna sai júrgizilýde.
