Baraat túni – Islamda erekshe mánge ie qasietti túnderdiń biri. Ol aqpan aiynyń ekisinen úshine qaraǵan túni kiredi jáne kún batqan sátten bastap tań namazyna deiin jalǵasady. “Baraat” sózi arab tilinen aýdarǵanda “tazarý”, “keshirim” degen maǵynalardy bildiredi. Iaǵni, bul tún Allanyń raqymy mol bolyp, táýbe etken pendelerdiń kúnálary keshiriletin ýaqyt retinde aitylady.
Bul túnniń negizgi ereksheligi – keshirim surap, júrekti tazartýǵa múmkindik berilýi. Hadisterde Alla Taǵala Baraat túni pendelerine meiirimmen qarap, shynaiy táýbe etkenderdiń kúnásin keshiretini baiandalady. Sondyqtan musylmandar bul túndi barynsha qulshylyqpen ótkizýge tyrysady.
Bul túni qandai qulshylyqtar jasalady?
Baraat túni arnaiy mindettelgen qulshylyq túri joq. Degenmen eń saýapty amaldardyń biri – nápil namaz oqý. Ásirese túnniń sońǵy bóliginde táhájjýd namazyn oqý quptalady. Namazdy eki rakaǵattan oqyp, Quran aiattaryn asyqpai oqý mańyzdy.
Qandai duǵalar oqylady?
Qurandy tolyq oqý mindet emes, jatqa biletin súrelerdi oqý nemese bir-eki parasyn mán berip oqý jetkilikti. Kópshilik bul túni “Iasin”, “Yqylas”, “Fálaq”, “Nas” súrelerin jii oqidy.
Zikir aitý da Baraat túniniń mańyzdy amaldarynyń biri. Allany eske alyp, “Sýbhanallah”, “Álhamdýlillah”, “Allahý ákbar”, “Lá iláhá illállah” dep aitý júrekti tynyshtandyryp, imandy kúsheitedi. Sonymen qatar paiǵambarymyzǵa salaýat aitý da saýapty is.
Bul túnde eń kóp jasalatyn duǵa – keshirim suraý duǵasy. Musylman adam Alladan óz kúnálarynyń keshirilýin, júreginiń tazarýyn suraidy. Densaýlyq, bereke, iman, sabyr, ata-ana men otbasynyń amandyǵy úshin duǵa jasaýǵa bolady. Sondai-aq marqum bolǵan jaqyndaryǵyzǵa duǵa baǵyshtaý da osy túnniń rýhyna sai amal.
Kúndizgi amaldar
Baraat túni nápil oraza ustaýǵa da bolady. Bul mindetti emes, biraq qosymsha saýapty amal bolyp sanalady.
Bul túni ne istemegen durys?
Baraat túni adamnyń ishki dúniesine úńilip, renishten arylyp, keshirimge keletin ýaqyt. Sondyqtan bul túndi bos áńgimemen, oiyn-saýyqpen nemese kúná istermen ótkizbeýge tyrysý kerek. Eń mańyzdysy shynaiy nietpen Allaǵa bet burý.
Qorytyndylai kele, Baraat túni – ár musylmanǵa berilgen rýhani múmkindik. Bul túnde kóp amal jasaýdan buryn, yqylas pen shynaiylyqqa mán bergen jón. Alla Taǵala nietpen jasalǵan árbir qulshylyqty qabyl etsin.
