باراات تٷنٸ – يسلامدا ەرەكشە مەنگە يە قاسيەتتٸ تٷندەردٸڭ بٸرٸ. ول اقپان ايىنىڭ ەكٸسٸنەن ٷشٸنە قاراعان تٷنٸ كٸرەدٸ جەنە كٷن باتقان سەتتەن باستاپ تاڭ نامازىنا دەيٸن جالعاسادى. “باراات” سٶزٸ اراب تٸلٸنەن اۋدارعاندا “تازارۋ”, “كەشٸرٸم” دەگەن ماعىنالاردى بٸلدٸرەدٸ. ياعني, بۇل تٷن اللانىڭ راقىمى مول بولىپ, تەۋبە ەتكەن پەندەلەردٸڭ كٷنەلارى كەشٸرٸلەتٸن ۋاقىت رەتٸندە ايتىلادى.
بۇل تٷننٸڭ نەگٸزگٸ ەرەكشەلٸگٸ – كەشٸرٸم سۇراپ, جٷرەكتٸ تازارتۋعا مٷمكٸندٸك بەرٸلۋٸ. حاديستەردە اللا تاعالا باراات تٷنٸ پەندەلەرٸنە مەيٸرٸممەن قاراپ, شىنايى تەۋبە ەتكەندەردٸڭ كٷنەسٸن كەشٸرەتٸنٸ باياندالادى. سوندىقتان مۇسىلماندار بۇل تٷندٸ بارىنشا قۇلشىلىقپەن ٶتكٸزۋگە تىرىسادى.
بۇل تٷنٸ قانداي قۇلشىلىقتار جاسالادى?
باراات تٷنٸ ارنايى مٸندەتتەلگەن قۇلشىلىق تٷرٸ جوق. دەگەنمەن ەڭ ساۋاپتى امالداردىڭ بٸرٸ – نەپٸل ناماز وقۋ. ەسٸرەسە تٷننٸڭ سوڭعى بٶلٸگٸندە تەھەججۋد نامازىن وقۋ قۇپتالادى. نامازدى ەكٸ راكاعاتتان وقىپ, قۇران اياتتارىن اسىقپاي وقۋ ماڭىزدى.
قانداي دۇعالار وقىلادى?
قۇراندى تولىق وقۋ مٸندەت ەمەس, جاتقا بٸلەتٸن سٷرەلەردٸ وقۋ نەمەسە بٸر-ەكٸ پاراسىن مەن بەرٸپ وقۋ جەتكٸلٸكتٸ. كٶپشٸلٸك بۇل تٷنٸ “ياسين”, “ىقىلاس”, “فەلاق”, “ناس” سٷرەلەرٸن جيٸ وقيدى.
زٸكٸر ايتۋ دا باراات تٷنٸنٸڭ ماڭىزدى امالدارىنىڭ بٸرٸ. اللانى ەسكە الىپ, “سۋبحاناللاھ”, “ەلحامدۋليللاھ”, “اللاھۋ ەكبار”, “لە يلەھە يللەللاھ” دەپ ايتۋ جٷرەكتٸ تىنىشتاندىرىپ, يماندى كٷشەيتەدٸ. سونىمەن قاتار پايعامبارىمىزعا سالاۋات ايتۋ دا ساۋاپتى ٸس.
بۇل تٷندە ەڭ كٶپ جاسالاتىن دۇعا – كەشٸرٸم سۇراۋ دۇعاسى. مۇسىلمان ادام اللادان ٶز كٷنەلارىنىڭ كەشٸرٸلۋٸن, جٷرەگٸنٸڭ تازارۋىن سۇرايدى. دەنساۋلىق, بەرەكە, يمان, سابىر, اتا-انا مەن وتباسىنىڭ اماندىعى ٷشٸن دۇعا جاساۋعا بولادى. سونداي-اق مارقۇم بولعان جاقىندارىعىزعا دۇعا باعىشتاۋ دا وسى تٷننٸڭ رۋحىنا ساي امال.
كٷندٸزگٸ امالدار
باراات تٷنٸ نەپٸل ورازا ۇستاۋعا دا بولادى. بۇل مٸندەتتٸ ەمەس, بٸراق قوسىمشا ساۋاپتى امال بولىپ سانالادى.
بۇل تٷنٸ نە ٸستەمەگەن دۇرىس?
باراات تٷنٸ ادامنىڭ ٸشكٸ دٷنيەسٸنە ٷڭٸلٸپ, رەنٸشتەن ارىلىپ, كەشٸرٸمگە كەلەتٸن ۋاقىت. سوندىقتان بۇل تٷندٸ بوس ەڭگٸمەمەن, ويىن-ساۋىقپەن نەمەسە كٷنە ٸستەرمەن ٶتكٸزبەۋگە تىرىسۋ كەرەك. ەڭ ماڭىزدىسى شىنايى نيەتپەن اللاعا بەت بۇرۋ.
قورىتىندىلاي كەلە, باراات تٷنٸ – ەر مۇسىلمانعا بەرٸلگەن رۋحاني مٷمكٸندٸك. بۇل تٷندە كٶپ امال جاساۋدان بۇرىن, ىقىلاس پەن شىنايىلىققا مەن بەرگەن جٶن. اللا تاعالا نيەتپەن جاسالعان ەربٸر قۇلشىلىقتى قابىل ەتسٸن.
