Májiliske qatysýshylardy kún tártibimen tanystyrǵan Úkimet basshysy Elbasynyń tapsyrmasymen Ońtústik Qazaqstanǵa jasaǵan jumys sapary barysynda óńirdegi birqatar óndiris oryndaryn aralap, jumysymen tanysqanyn aıtty. Sondaı-aq, halyqty jumyspen qamtý jaıyn sóz etip, kóshi-qondaǵy qoldaý máselesin atap ótti.
«Ońtústik óńiriniń halqy isker, olardy úıretýdiń qajeti joq. Tek qana jumystyń jobasyn kórsetseń, ózderi alyp ketedi. Oblystyń ózin-ózi qamtamasyz etýge múmkindigi joǵary. Baý-baqshany damytý salasy boıynsha da sharýany alǵa qaraı alyp kete alady. Kásipkerlikti damytý úshin berilip jatqan kómekter jetkilikti ma, qosymsha zańdardy qaıta qarastyryp, sol arqyly kómek qajet pa, sol jaǵyn qarastyrýymyz kerek», - dedi Baqytjan Saǵyntaev.
Sonymen birge, Premer-Mınıstr ońtústikten soltústik aımaqqa kóshý máselesine de toqtaldy. Bul baǵytta júıeli jumystardyń atqarylý barysyn sóz etken Baqytjan Saǵyntaev kóship barǵan azamattarǵa jer berý, olardy turaqty jumyspen, baspanamen qamtý qajettigin atap ótti. Ásirese, iskerlik qabileti joǵary sharýalar men kásipkerlerdi jiberý qajettigin aıtty.
Budan bólek, jıynda Ońtústik Qazaqstan oblysynyń ákimi Janseıit Túımebaev týrızm jáne kásipkerlik salalarynda atqarylǵan jumystar jaıyn baıandady. Memleket basshysynyń saıasatynyń arqasynda oblystyń damýy úshin barlyq múmkindikter jasalyp jatqanyn aıtqan aımaq basshysy óńir halqynyń turmys-tirshiligin jaqsartý úshin alǵa qoıǵan mindetter oryndalýda dep málimdedi.
«Oblysymyzda ındýstrıaldy-ınnovasıalyq damý baǵdarlamasy sátti júrgizilýde. Baǵdarlama aıasynda jalpy 208 mlrd teńgege 162 joba iske asyrylyp, 9,5 myń jańa jumys orny ashyldy. Onyń ishinde 2017 jyly 5 joba iske qosylyp, 2,3 mlrd teńge ınvestısıa tartyldy. Búgingi tańda iske qosylǵan jobalardyń 94%-y josparlyq qýattylyqty ıgerip, 71 mlrd teńgeniń ónimin óndirdi. Elbasynyń aýyl sharýashylyǵyn ekonomıkalyq damýdyń jańa draıverine aınaldyrý jónindegi tapsyrmasyn oryndaý nátıjesinde ónim kólemi ótken jyldyń tıisti kezeńimen salystyrǵanda 1,9%-ǵa artyp, 257,4 mlrd teńgeni qurady. Qazirgi kezde oblysta qolaıly bıznes klımatty qalyptastyrý jáne kásipkerlik bastamalardy iske asyrý úshin barynsha jaǵdaı jasalýda», - dedi J.Túımebaev.
Óńir basshysy munymen qosa oblysta «Agroónerkásip keshenin damytýdyń» memlekettik baǵdarlamasynyń talaptaryna sáıkes keletin 158 kooperatıv ashylǵanyn habarlady. Aýyl sharýashylyǵy salasyna baǵyttalǵan ınvestısıa kólemi 21,8 mlrd teńgeni qurap, ótken jyldyń tıisti kezeńimen salystyrǵanda 5,5 esege artqan. Aımaq basshysy osy saladaǵy ilkimdi isterdiń biri - bıyl Shymkent mehanıkalyq zaýytynyń bazasynda modýldik sút qabyldaý beketterin jınaý óndirisi bastalǵanyn aıtty. Búgingi tańda 15 modýldik sút qabyldaý beketi kooperatıvterge qosymsha kepilsiz jáne aldyn ala tólemsiz nesıege berildi. Aıta ketý kerek, bekettiń qunynyń 50 paıyzyn sýbsıdıa retinde memleket tóleıdi.
Basqosýda oblys ákimi Ońtústik Qazaqstan oblysynda týrısik salanyń da turaqty damyp kele jatqanyn málimdedi. Oblysta týrısik nysandar sany 195 birlikti qurap, tıisinshe 31 paıyzǵa ósken. Munda kórsetilgen qyzmet kólemi 1,7 mlrd teńgeni qurap, 43 paıyzǵa artqany baıqalady. Bıyl oblysymyzǵa 128 myń týrıs kelip, ótken jyldyń tıisti kezeńimen salystyrǵanda 55,3 paıyzǵa kóbeıgen.
Keleli jıyn sońynda Qazaqstan Respýblıkasynyń Premer-Mınıstri Baqytjan Saǵyntaev «Kórme» ortalyǵyna qoıylǵan taýar óndirýshilerdiń kórmesin tamashalady. Onda 69 kásipker tekstıl, taǵam ónerkásibi, qurylys jáne mashına jasaý salasyndaǵy óz ónimderin usyndy. Delegattar kórmede dárilik preparattar, medısınalyq quraldar, qurylys taýarlary men azyq-túlik ónimderin tamashalady. Sonymen qatar Úkimet basshysy modýldi sút qabyldaý beketteri men áleýmettik dúken úlgisimen tanysty. Premer-Mınıstr bul jobalardy joǵary baǵalap, ári qaraı damytýdy tapsyrdy.
OQO ákiminiń baspasóz qyzmeti
