ماجىلىسكە قاتىسۋشىلاردى كۇن تارتىبىمەن تانىستىرعان ۇكىمەت باسشىسى ەلباسىنىڭ تاپسىرماسىمەن وڭتۇستىك قازاقستانعا جاساعان جۇمىس ساپارى بارىسىندا وڭىردەگى ءبىرقاتار ءوندىرىس ورىندارىن ارالاپ، جۇمىسىمەن تانىسقانىن ايتتى. سونداي-اق، حالىقتى جۇمىسپەن قامتۋ جايىن ءسوز ەتىپ، كوشى-قونداعى قولداۋ ماسەلەسىن اتاپ ءوتتى.
«وڭتۇستىك ءوڭىرىنىڭ حالقى ىسكەر، ولاردى ۇيرەتۋدىڭ قاجەتى جوق. تەك قانا جۇمىستىڭ جوباسىن كورسەتسەڭ، وزدەرى الىپ كەتەدى. وبلىستىڭ ءوزىن-وزى قامتاماسىز ەتۋگە مۇمكىندىگى جوعارى. باۋ-باقشانى دامىتۋ سالاسى بويىنشا دا شارۋانى العا قاراي الىپ كەتە الادى. كاسىپكەرلىكتى دامىتۋ ءۇشىن بەرىلىپ جاتقان كومەكتەر جەتكىلىكتى ما، قوسىمشا زاڭداردى قايتا قاراستىرىپ، سول ارقىلى كومەك قاجەت پا، سول جاعىن قاراستىرۋىمىز كەرەك»، - دەدى باقىتجان ساعىنتايەۆ.
سونىمەن بىرگە، پرەمەر-مينيستر وڭتۇستىكتەن سولتۇستىك ايماققا كوشۋ ماسەلەسىنە دە توقتالدى. بۇل باعىتتا جۇيەلى جۇمىستاردىڭ اتقارىلۋ بارىسىن ءسوز ەتكەن باقىتجان ساعىنتايەۆ كوشىپ بارعان ازاماتتارعا جەر بەرۋ، ولاردى تۇراقتى جۇمىسپەن، باسپانامەن قامتۋ قاجەتتىگىن اتاپ ءوتتى. اسىرەسە، ىسكەرلىك قابىلەتى جوعارى شارۋالار مەن كاسىپكەرلەردى جىبەرۋ قاجەتتىگىن ايتتى.
بۇدان بولەك، جيىندا وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ تۋريزم جانە كاسىپكەرلىك سالالارىندا اتقارىلعان جۇمىستار جايىن باياندادى. مەملەكەت باسشىسىنىڭ ساياساتىنىڭ ارقاسىندا وبلىستىڭ دامۋى ءۇشىن بارلىق مۇمكىندىكتەر جاسالىپ جاتقانىن ايتقان ايماق باسشىسى ءوڭىر حالقىنىڭ تۇرمىس-تىرشىلىگىن جاقسارتۋ ءۇشىن العا قويعان مىندەتتەر ورىندالۋدا دەپ مالىمدەدى.
«وبلىسىمىزدا يندۋستريالدى-يننوۆاسيالىق دامۋ باعدارلاماسى ءساتتى جۇرگىزىلۋدە. باعدارلاما اياسىندا جالپى 208 ملرد تەڭگەگە 162 جوبا ىسكە اسىرىلىپ، 9،5 مىڭ جاڭا جۇمىس ورنى اشىلدى. ونىڭ ىشىندە 2017 جىلى 5 جوبا ىسكە قوسىلىپ، 2،3 ملرد تەڭگە ينۆەستيسيا تارتىلدى. بۇگىنگى تاڭدا ىسكە قوسىلعان جوبالاردىڭ 94%-ى جوسپارلىق قۋاتتىلىقتى يگەرىپ، 71 ملرد تەڭگەنىڭ ءونىمىن ءوندىردى. ەلباسىنىڭ اۋىل شارۋاشىلىعىن ەكونوميكالىق دامۋدىڭ جاڭا درايۆەرىنە اينالدىرۋ جونىندەگى تاپسىرماسىن ورىنداۋ ناتيجەسىندە ءونىم كولەمى وتكەن جىلدىڭ ءتيىستى كەزەڭىمەن سالىستىرعاندا 1،9%-عا ارتىپ، 257،4 ملرد تەڭگەنى قۇرادى. قازىرگى كەزدە وبلىستا قولايلى بيزنەس كليماتتى قالىپتاستىرۋ جانە كاسىپكەرلىك باستامالاردى ىسكە اسىرۋ ءۇشىن بارىنشا جاعداي جاسالۋدا»، - دەدى ج.تۇيمەبايەۆ.
ءوڭىر باسشىسى مۇنىمەن قوسا وبلىستا «اگروونەركاسىپ كەشەنىن دامىتۋدىڭ» مەملەكەتتىك باعدارلاماسىنىڭ تالاپتارىنا سايكەس كەلەتىن 158 كووپەراتيۆ اشىلعانىن حابارلادى. اۋىل شارۋاشىلىعى سالاسىنا باعىتتالعان ينۆەستيسيا كولەمى 21،8 ملرد تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 5،5 ەسەگە ارتقان. ايماق باسشىسى وسى سالاداعى ىلكىمدى ىستەردىڭ ءبىرى - بيىل شىمكەنت مەحانيكالىق زاۋىتىنىڭ بازاسىندا مودۋلدىك ءسۇت قابىلداۋ بەكەتتەرىن جيناۋ ءوندىرىسى باستالعانىن ايتتى. بۇگىنگى تاڭدا 15 مودۋلدىك ءسۇت قابىلداۋ بەكەتى كووپەراتيۆتەرگە قوسىمشا كەپىلسىز جانە الدىن الا تولەمسىز نەسيەگە بەرىلدى. ايتا كەتۋ كەرەك، بەكەتتىڭ قۇنىنىڭ 50 پايىزىن سۋبسيديا رەتىندە مەملەكەت تولەيدى.
باسقوسۋدا وبلىس اكىمى وڭتۇستىك قازاقستان وبلىسىندا تۋريستىك سالانىڭ دا تۇراقتى دامىپ كەلە جاتقانىن مالىمدەدى. وبلىستا تۋريستىك نىساندار سانى 195 بىرلىكتى قۇراپ، تيىسىنشە 31 پايىزعا وسكەن. مۇندا كورسەتىلگەن قىزمەت كولەمى 1،7 ملرد تەڭگەنى قۇراپ، 43 پايىزعا ارتقانى بايقالادى. بيىل وبلىسىمىزعا 128 مىڭ تۋريست كەلىپ، وتكەن جىلدىڭ ءتيىستى كەزەڭىمەن سالىستىرعاندا 55،3 پايىزعا كوبەيگەن.
كەلەلى جيىن سوڭىندا قازاقستان رەسپۋبليكاسىنىڭ پرەمەر-مينيسترى باقىتجان ساعىنتايەۆ «كورمە» ورتالىعىنا قويىلعان تاۋار وندىرۋشىلەردىڭ كورمەسىن تاماشالادى. وندا 69 كاسىپكەر تەكستيل، تاعام ونەركاسىبى، قۇرىلىس جانە ماشينا جاساۋ سالاسىنداعى ءوز ونىمدەرىن ۇسىندى. دەلەگاتتار كورمەدە دارىلىك پرەپاراتتار، مەديسينالىق قۇرالدار، قۇرىلىس تاۋارلارى مەن ازىق-تۇلىك ونىمدەرىن تاماشالادى. سونىمەن قاتار ۇكىمەت باسشىسى ءمودۋلدى ءسۇت قابىلداۋ بەكەتتەرى مەن الەۋمەتتىك دۇكەن ۇلگىسىمەن تانىستى. پرەمەر-مينيستر بۇل جوبالاردى جوعارى باعالاپ، ءارى قاراي دامىتۋدى تاپسىردى.
وقو اكىمىنىڭ باسپا ءسوز قىزمەتى
