Qala turǵyndarynyń suraqtaryna jaýap bergen Baqytjan Saǵyntaev 15 qarashanyń tún ortasynda 29 jasqa deiingi jumys isteitin jastar úshin jalǵa beriletin turǵyn úi baǵdarlamasy boiynsha ótinimder qabyldaý bastalatynyn habarlady. Ótinimderdi aǵymdaǵy jyldyń 20 qarashasynda saǵat 23.59-ǵa deiin berýge bolady.
Ótinimderdi qabyldaý www.almaty-jastary.info. saitynda júrgiziledi, saitqa kirý ótinish berýshilerdiń elektrondyq-tsifrlyq kiltteri boiynsha júzege asyrylady.
Baǵdarlamaǵa qatysýshylarǵa qoiylatyn negizgi talaptar: jasy – 29 jasqa deiin, Almatyda sońǵy eki jyldan kem emes turaqty tirkelýi, sońǵy eki jyl ishinde Qazaqstan aýmaǵynda turǵyn úiiniń bolmaýy. Budan basqa, sońǵy 6 aida úmitkerlerdiń ai saiynǵy jalaqysy 40 AEK-ten joǵary bolýy tiis – 116 680 teńge.
Qajetti qujattardyń, jii qoiylatyn suraqtardyń tizbesi týraly tolyq aqparat joǵaryda kórsetilgen saitta jariialanǵan.
Beriletin páterler Naýryzbai aýdanyndaǵy «Alma Siti-5» jańa TK jáne Alataý aýdanyndaǵy «Mádeniet» TK ornalasqan. Jalpy sany – 1 050 bir bólmeli páter. Jalǵa berý merzimi – uzartý quqyǵynsyz 5 jyl.
Budan basqa, qalada jastarǵa «Almaty jastary 3.0» jeńildetilgen nesie berý baǵdarlamasy jumys isteidi. Baǵdarlama biýdjeti – 18 mlrd teńge. Qaryzdyń eń joǵarǵy somasy – 18 mln teńgege deiin, paiyzdyq mólsherleme – 5%, bastapqy jarna – 10%.
Osy baǵdarlama boiynsha jyl saiyn 1000 jas bastapqy jáne qaitalama turǵyn úi satyp alý múmkindigine ie bolady. Búgingi tańda «Almaty Jastary 3.0» baǵdarlamasy boiynsha 14,7 mlrd teńge somasyna 868 zaem berildi.
Baǵdarlama bilim berý, densaýlyq saqtaý, mádeniet jáne sport, BAQ, áleýmettik salalarda jumys isteitin jastarǵa arnalǵan. Sondai-aq, ony joǵary oqý oryndary men ǴZI, quqyq qorǵaý organdarynyń qyzmetkerleri paidalana alady.
