Májilis depýtaty Baqytjan Bazarbek "Bolashaq" baǵdarlamasy aıasynda búdjet esebinen zańsyz shetelde oqyp júrgenderdiń esimin jarıalaýdy talap etti, dep habarlaıdy Dalanews.kz.

Bul másele Úkimet saǵatynda kóterildi. Depýtattyń aıtýynsha, 15 úmitker boıynsha respýblıkalyq komısıanyń sheshimi joq, dese de olar shetelde bilim alyp júr. Sonymen qatar, 151 stıpendıa jospardan tys, belgilengen lımıtten asyra, jalpy somasy 2 mlrd 519 mln teńgege taǵaıyndalǵan.

Baqytjan Bazarbek 71 úmitker bir-birine jasyryn túrde kepil bolǵanyn aıtty. Ol bul jaǵdaı boıynsha keltirilgen shyǵyndy 876 mln teńgege baǵalady.

Depýtattyń sózinshe, jalpy kúmán týdyratyn soma shamamen 10 mlrd teńgege jetýi múmkin. Ol mınıstrlik naqty áreket jasap, shetelde memleket qarjysy esebinen oqyp júrgenderdiń tizimin ashyq jarıalaýy qajet ekenin aıtty.

Eske salaıyq, buǵan deıin "Bolashaq" stıpendıasy "kúmándi" jolmen bólingenin jazdyq.