Nege.kz tilshisi Bolat Baqaýovtyń isine qatysty zertteý júrgizip, "tergeý qupiiasyna" jatpaityn birqatar jaitty anyqtady, dep habarlaidy dalanews.kz
Ekskliýziv materialda buǵan deiin jariialanbaǵan derekter keltirilgen. Máselen, Baqaýovpen birge Baianaýyl aýdanynyń burynǵy ákimi Orazgeldi Qaiyrgeldinovtiń ústinen qylmystyq is qozǵalǵany aitylady. Sol sekildi onda Pavlodar ákiminiń ústinen aryzdanǵan adamnyń aty-jóni de, tipti onyń bir dókeidiń kúieýbalasy ekeni de keltirilgen.
Buǵan deiin BAQ betterinde Pavlodar oblysynyń ákimi Bolat Baqaýovtyń ústinen "laýazymdy sheneýnik" aryz jazǵanyn habarlanǵan.
Tilshimiz anyqtaǵandai, Baqaýovtyń ústinen Pavlodar oblysy boiynsha memlekettik kirister departamenti basshysynyń mindetin atqarýshy Baýyrjan Ainabekov aryz jazǵan. Qylmystyq is te osy aryzdyń negizinde qozǵalǵan.
Baýyrjan Ainabekov týraly ne bilemiz?
Ashyq aqparat kózderindegi derekke qaraǵanda, ol 1971 jyly týǵan. Aýyl sharýashylyǵy institýtyn ekonomist mamandyǵy boiynsha bitirgen. Ekinshi mamandyǵy – quqyqtanýshy. Ár jyldary Almaty oblysynyń, Almaty qalasynyń salyq basqarmalarynda túrli qyzmet atqarǵan. 2019 jyldyń 8 mamyrynan beri Pavlodar oblysynyń memlekettik kirister departamenti basshysynyń mindetin atqarýshy.
Derekózdiń málimetinshe, departament basshysy mindetin atqarýshy Baýyrjan Ainabekov oblys ákimi Bolat Baqaýovqa óńirdegi jumysy tekserilýge tiis iri kompaniialardyń tizimin alyp kirgen kórinedi.
Baqaýov úshin bar bále osy tustan bastalǵan syńaily. Ol Ainabekovke "tiisýge bolmaityndar" men "shuqshiia tekserýdi qajet etetinderdiń" tizimin kórsetip bergen de, tapsyrma oryndalmaǵan jaǵdaida ózine qiyn bolatynyn eskertipti. "Eskertý" alǵan Ainabekov birden UQK-ge aryq jazǵan. Mine, Baqaýovtyń "qyzmet babyn asyra paidalanǵan" jeri osy bolsa kerek...
Bul iste áli sóz bola qoimaǵan taǵy bir túitkil bar.
Ádette mundai ispen Sybailas jemqorlyqqa qarsy is-qimyl agenttigi ainalysatyn. Al endi Baqaýovty nege Ulttyq qaýipsizdik komiteti ustady?
Derekkózdiń málimetine qaraǵanda, jýyrda Bolat Baqaýovtyń isine bailanysty budan basqa da "jańa derekter" paida bolyp, taǵy birneshe bap boiynsha qylmystyq is jamalýy múmkin. Óitkeni, "tistegen jerinde tisi qalatyn" UQK mundai iske bekerden-beker kirispeidi.
Baqaýovpen birge Baianaýyl aýdanynyń burynǵy ákimi Orazgeldi Qaiyrgeldinovtiń de ústinen qylmystyq is qozǵalǵany habarlanǵan. Alaida, Qaiyrgeldinov pavlodarnews.kz tilshisine ózine eshqandai aiyp taǵylmaǵanyn, aýdan ákimi qyzmetinen ketýiniń qylmystyq iske esh qatysy joq ekenin málimdedi.
– Biýdjet qarjysynyń urlanýyna bailanysty maǵan eshqandai aiyp taǵylǵan joq. Eger qandai da bir qylmystyq is qozǵalsa, ol maǵan qatysty emes. Barlyq jaýapkershilikti moinyma ala otyryp, BAQ pen áleýmettik jelide jazylyp jatqannyń bári ótirik ekenin málimdeimin, – dedi Qaiyrgeldinov.
Aitpaqshy, Baqaýovtyń ústinen UQK-ge aryz jazǵan Ainabekovke qatysty áleýmettik jelide taǵy bir derektiń basy qyltidy.
Telegramm kanalynda "Mýdryi baja" degen atpen tirkelgen qoldanýshynyń jazýyna qaraǵanda, Ainabekov áldebir myqtynyń kúieýbalasy kórinedi...
