Bul týraly Májilistiń jalpy otyrysynda depýtat Azat Perýashev aitty, dep habarlaidy Dalanews.kz Baq.kz-ge siltep.
"Azamattardyń bankrottyǵy týraly zań jobasyn ázirleý bastamasyn eń alǵash bolyp «Aq jol» fraktsiiasy 2013 jyly usynǵan bolatyn. Sodan beri biz jyl saiyn bul máseleni qaita kóterip keldik. Úkimet oǵan ártúrli syltaý aityp, keiinge qaldyryp keldi. Byltyr Prezident bul zań jobasyn qabyldaý boiynsha naqty tapsyrma berdi.
Biz eki ret ózimizdiń zań jobamyzdy da ázirlep berdik, Úkimet olardy da ótkizbedi. Bizdiń negizgi maqsatymyz nesie tólei almaityn jaǵdaiǵa dýshar bolǵan azamattarǵa áleýmettik kepildikti belgileý boldy.
Bizdiń elimiz talai ekonomikalyq daǵdarystan ótti. Adamdar jumysynan aiyrylyp, nesielerin tólei almady. Al bizdiń bankter ne istedi? Olar adamdardy dalaǵa shyǵaryp jiberip, olardy «bomjdarǵa» ainaldyrdy", - dedi Azat Perýashev.
Depýtattyń aitýynsha, XXI ǵasyrda órkenietti elde ómir súrip jatqan kezeńde azamattardy bomjdarǵa ainaldyrýǵa jol bermeý kerek.
"Otbasy, balasy men jumysy barlardy «bomjdarǵa» ainaldyrý durys emes. Bul - bizdiń azamattar, biz memleket retinde olar úshin jaýaptymyz. Osy máseleni biz osy zań jobasynda da qarastyrdyq. Kóptegen suraq talqylandy.
Biz búgin protsedýralyq rásimge kóp kóńil bólip kettik, olardyń barlyǵy qosalqy suraq. Eń bastysy - biz óz azamattarymyzdyń bomjdarǵa ainalýyna jol bermeý.
Prezident buqaralyq kásipkerlikti damytý boiynsha tapsyrma berdi. Men biznespen kim ainalysqanyn eske salaiyn. Kezinde olar kepilge páterin, úiin qoidy.
Qazir biz óz azamattarymyzdyń baspanaǵa ielik etýin quqyǵyn qorǵamasaq, biz tek ipoteka tóleýshiden ǵana emes, áleýetti kásipkerden aiyrylamyz", - dedi ol.
Depýtat azamattardyń jalǵyz baspanasyn kepilge qoiyp, artynan ony alyp qoiý normasyn synady.
"Azamattyq kodekste jalǵyz baspanasynan aiyrmaý týraly norma boldy. Bul normany alyp tastaý bankterdiń múddesinen sheshildi. Byltyr qylmysker jalǵyz úiin alýǵa kelgen 5 sot oryndaýshy men politsiiany atyp tastady. Áiel adam turatyn úii bolmaǵandyqtan, óziniń balalaryn terezeden laqtyrýǵa májbúr boldy. Biz osyndai áreketterge azamattardy qashanǵa deiin itermeleimiz? Byltyr «Bank jáne bank qyzmeti týraly» zań aiasynda nesieniń 90 paiyzyn ótegen jaǵdaida «qaita kepilge qoiý múmkindigi bar» degen óte ózekti normany engize aldyq. Osy normany da dál qazirgidei jaǵdaida jeńil sharttarmen qoldanaiyq. Eger azamat ipotekasynyń ne bolmasa biznes kreditiniń keminde jartysyn japqan jaǵdaida, ony jalǵyz baspanasynan aiyrmaiyq.
Ne bolmasa, oǵan áleýmettik baspana berý qajet. Iia, árine, bul bankterge júkteme bolady. Biraq bizde bankter QQS-dan bosatylǵan, onymen qosa, memleketten túrli qoldaý alady. Sol sebepti biz osy máseleniń sheshimi bar dep oilaimyz", - dep atap ótti Perýashev Májiliste.
Ol adamdardy osyndai halge túsiretin nárse – ol nesieler boiynsha joǵary, miǵa syimaityn paiyzdar ekenin aitty.
"Ulttyq bank, sizder qaida qarap otyrsyzdar? Ai saiyn bazalyq stavka mólsherin kóbeitesizder. Qansha qinaýǵa bolady? Sizder adamdardy qandai jaǵdaiǵa jetkizip otyrǵandaryńyzdy túsinbeisizder me?" – deidi depýtat.
Azat Perýashev joǵaryda aitylǵan máselelerdi eskere otyryp, zań jobasyn qaita qaraýdy usyndy.
"Kommertsiialyq bankterge jumys isteýdi toqtatyp, memleketti oilaýǵa kiriseiik. Biz zań jobasyn qoldaimyz. Onda kóp máselege kóterilgen. Biraq jańa aitylǵan máselelerdi ekinshi oqylymda qaraýdy usynamyz", - dep sózin qorytyndylady depýtat.
Búgin Májilistiń jalpy otyrysynda Qarjy ministri Erulan Jamaýbaev depýtattarǵa «Qazaqstan Respýblikasy azamattarynyń tólem qabilettiligi jáne bankrottyǵy týraly» zań jobasyn birinshi oqylymda tanystyrǵan.
