Balqash qalasynyń Qońyrat shaǵyn aýdanyndaǵy №3 jalpy bilim beretin mekteptiń jabylý qaýpi týyndap otyr. Osyǵan alańdaǵan ata-analar Memleket basshysynyń ákimshiligine hat joldap, mektepti saqtap qalýdy suraýda, dep habarlaıdy Dalanews.kz.
Ata-analar balalardyń qaıda baryp bilim alatynyna alańdaýly. Olar bıliktiń sheshim qabyldarda óz pikirlerimen sanaspaı otyrǵanyna da narazy. Qońyrat aýdany úshin bul mektep erekshe mańyzdy, óıtkeni ol aýdandaǵy orys tilinde bilim beretin jalǵyz mekeme.
2025 jyly mektep ǵımaratyna tehnıkalyq saraptama júrgizilip, onyń kúrdeli jóndeýdi qajet etetini anyqtalǵan. Alaıda jergilikti bılik jóndeý jumystaryn júrgizýge qarjynyń joqtyǵyn alǵa tartýda.
Táýelsiz saraptama qorytyndysyna sáıkes, mektep ǵımaratynyń jaǵdaıy nashar, tozý deńgeıi joǵary. Buryn Qońyrat jeke eldi meken bolyp, keıin shaǵyn aýdanǵa aınalǵandyqtan, oqýshy sany da kúrt azaıǵan. Bul mekteptiń "shaǵyn komplektili" bolýyna ákelgen. Oqýshy sanynyń jetispeýi de mekteptiń jabylýyna sebep bolýy múmkin.
"Mektepke bilim basqarmasynan ókilder, Balqash qalasy ákiminiń orynbasary da keldi. Saraptama qorytyndysy ǵımarattyń apat aldyndaǵy jaǵdaıda ekenin kórsetti. Kúrdeli jóndeý qajet, biraq jergilikti búdjette qarajat joq deıdi. 88 jyldyq tarıhy bar mektepte birneshe býyn bilim alǵanymen, osy ýaqytqa deıin birde-bir ret tolyqqandy kúrdeli jóndeý júrgizilmegen. Ǵımarattyń irgetasy men shatyry ǵana ishinara jóndelgen, onyń ózi arasy 10 jylǵa deıin sozylyp otyrǵan", – deıdi jergilikti turǵyn Iýlıa Pıkalova.
Qaraǵandy oblystyq bilim basqarmasy mektep ǵımaratyndaǵy qaýipsizdikke erekshe mán beriletinin aıtady. Degenmen №3 mekteptiń jabylatyny jóninde resmı málimdeme jasalmaǵan.
"Oqýshylar men muǵalimderdiń qaýipsizdigin qamtamasyz etý maqsatynda №3 mektepti ýaqytsha Ybyraı Altynsarın atyndaǵy №25 jalpy bilim beretin mekteppen biriktirý máselesi qarastyrylýda. Jańa oqý jylyna daıyndyq josparǵa sáıkes júrgizilýde. Mekteptiń taǵdyry arnaıy komısıanyń qorytyndysynan keıin sheshiledi. Ǵımarat jóndeýge jaramdy bolsa, mektep jumysyn jalǵastyrady", – deıdi basqarma ókilderi.
Komısıa tekserisiniń naqty merzimi ázirge belgisiz.
