Qarjy monitoringi agenttigi endi uialy telefonnyń balansyndaǵy aqshany da tekseredi. Biraq bárinikin birdei jaǵalai emes. Bul arada ádetten tys aqsha toltyrý jaǵdailary nazarǵa alynady. Bul týraly Qarjy monitoringi agenttigi tóraǵasynyń orynbasary Jeńis Elemesov kúni keshe Májilis dálizinde jýrnalisterge bergen suqbatynda aitty, dep habarlaidy Dalanews.kz.
Mundai norma Qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl máseleleri jónindegi zań jobasyna engizilgen eken. Májilis depýtattary atalǵan zań jobasyn birinshi oqylymda maquldady. Qujatta qarjy monitoringi sýbektileriniń tizimine uialy bailanys operatorlary da engizilgeni kórsetilgen.
"Qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl týraly" QR zańnamasyn buzý Ákimshilik quqyq buzýshylyq týraly kodekstiń 214-baby boiynsha jaýapkershilik kózdelgen. Atalǵan baptyń sanktsiiasy boiynsha 20 AEK-ten 600 AEK-ke deiingi mólsherde aiyppul qarastyrylǵan, onyń aýyrlyǵy men saldaryna bailanysty litsenziiadan aiyrýǵa deiin jaza qarastyrylady", - dedi Jeńis Elemesov.
Onyń aitýynsha, ártúrli adamdardyń balansty únemi tolyqtyryp otyrýy kúdikke ilinedi.
"Bizdi tek balansty tolyqtyrý ǵana emes, erekshe, ádetten tys tolyqtyrýlar da qyzyqtyrady. Ózderińizge belgili, balansty tolyqtyrý arqyly adamdar qazir bir-birine aqsha aýdarady, óitkeni ony terminal arqyly alýǵa bolady jáne ondai tásildi aqshany jylystatý kezinde paidalanýǵa bolady", – deidi ol.
Buǵan deiin saitymyzda Qarjy monitoringi agenttigi tárkilengen tsifrlyq aktivterdi saqtaý úshin Binance-den kriptoámiian ashqanyn jazǵanbyz.
