Almaty oblystyq №1 balalar úiiniń tárbielenýshileri Qonaev qalasyna baryp, jańa ǵimarattyń qurylysymen tanysady. Bul týraly Almaty oblysynyń bilim basqarmasy aitty,- dep habarlaidy Dalanews.kz
3 naýryzda balalar jańa mekemeni qarap, ondaǵy turmys jaǵdaiymen tanysyp oblys ákimi Marat Sultanǵazievpen kezdesedi. Jańa ǵimaratty kóretin tárbielenýshiler qatarynda Kirill Kapranov, Aleksei Nekrasov jáne Denis Ýzlov bar.
2 naýryzda balalar úiine Almaty oblystyq bilim basqarmasynyń basshysy Saltanat Bespaeva baryp, mekeme ujymy jáne tárbielenýshilerimen kezdesti. Kezdesý barysynda qyzmetkerler qonys aýdarý jáne jumys oryndaryn saqtaý máselelerin kóterdi.
“Balalar úii men onyń tárbielenýshilerine qatysty barlyq máseleler bizdiń baqylaýymyzda. Jańa ǵimaratty qajetti jabdyqtarmen, kólikpen jáne mektep quraldarymen qamtamasyz etý ǵana emes, balalardyń qaýipsizdigin saqtai otyryp, qolaily jaǵdai jasaý da mańyzdy”, — dep atap ótti Saltanat Bespaeva.
Sondai-aq, basqarma áleýmettik jelilerde taraǵan jer ýchaskesiniń affiliirlengen tulǵalarǵa satylýy týraly qaýesetterdi joqqa shyǵardy.
Jańa keshen 240 orynǵa eseptelgen jáne aýmaǵy 4000 sharshy metrdy quraidy. Qurylys 1963 jyly salynǵan eski ǵimarattyń apatty jaǵdaiyna bailanysty júrgizilýde. Jańa mekeme quramynda kámeletke tolmaǵandardy beiimdeý ortalyǵy da jumys isteidi. Ǵimarat 900 oryndyq mekteptiń janynda ornalasady. Balalardyń qatynaýy úshin 14 oryndyq avtobýs bólindi. Almatyǵa deiingi qashyqtyq – 65 km.
Budan bólek, tárbielenýshiler 21 naýryzda Qonaev qalasynda ótetin Naýryz meiramyna shaqyryldy.
