Májilis depýtaty Dáýlet Muqaev jastar arasynda keńinen taralyp jatqan kvadrobika máselesine alańdaýshylyq bildirdi, dep habarlaidy Dalanews.kz.
”Kvadroberler – adam bolýdan bas tartyp, ózin janýarǵa teńeitinder. Olar tórt aiaqtap júrip, janýar beinesindegi betperde kiip, it pen mysyq siiaqty áreket jasaidy. Bul – balalar men jasóspirimderge tónip turǵan qaýip. Olar tek syrtqy túrin ǵana ózgertpei, janýarlarǵa tán qylyqtar jasap, adamdarǵa shabýyldaý, tyrnaý, tisteý sekildi áreketterge barady. Mundai jaǵdailar Resei men Ózbekstanda da tirkelgen. Áleýmettik jelilerde kvadrober bolýdy úiretetin jabyq toptar men arnaiy sabaqtar paida boldy”, – deidi Muqaev.
Depýtattyń aitýynsha, bul balalardyń psihologiiasy men áleýmettik damýyna keri áserin tigizip, shekten shyǵyp barady.
“Batys elderinde balalar sabaqta sóilesýdiń ornyna janýarsha dybystaityn boldy. Bul sýbmádenietke arnaiy keshter ótkizilip, kerek-jaraqtary biznes kózine ainalyp, joǵary baǵamen satylýda. Balalar adamdyq qasietterden alystap, janýar bolýǵa áýestenip jatyr. Eger bul úrdiske tosqaýyl qoimasaq, bir urpaqty joǵaltyp alý qaýpi bar”, – dep eskertti ol.
Muqaevtyń aitýynsha, álem elderi bul máselege alańdaýshylyq bildirýde.
“Balalardyń osy sýbmádenietke qyzyǵýshylyǵy artqanyn kórgende, ata-analar men qoǵamǵa belsendi áreket etý qajet. Bul – tek ata-ananyń emes, búkil qoǵam men memlekettiń máselesi. Biz áleýmettik jelilerdi baqylaýda ustap, quqyqtyq tosqaýyl qoiýymyz kerek. Reseide zań qabyldaý talqylanyp jatsa, Ózbekstanda ata-ana mindetin durys oryndamaǵany úshin aiyppul salý qarastyrylýda. Qazaqstanda da quzyrly organdar bul máselege keshendi sharalar qabyldaýy tiis”, – dep túiindedi depýtat.
