ءماجىلىس دەپۋتاتى داۋلەت مۇقايەۆ جاستار اراسىندا كەڭىنەن تارالىپ جاتقان كۆادروبيكا ماسەلەسىنە الاڭداۋشىلىق ءبىلدىردى، دەپ حابارلايدى Dalanews.kz.
”كۆادروبەرلەر – ادام بولۋدان باس تارتىپ، ءوزىن جانۋارعا تەڭەيتىندەر. ولار ءتورت اياقتاپ ءجۇرىپ، جانۋار بەينەسىندەگى بەتپەردە كيىپ، يت پەن مىسىق سياقتى ارەكەت جاسايدى. بۇل – بالالار مەن جاسوسپىرىمدەرگە ءتونىپ تۇرعان ءقاۋىپ. ولار تەك سىرتقى ءتۇرىن عانا وزگەرتپەي، جانۋارلارعا ءتان قىلىقتار جاساپ، ادامدارعا شابۋىلداۋ، تىرناۋ، تىستەۋ سەكىلدى ارەكەتتەرگە بارادى. مۇنداي جاعدايلار رەسەي مەن وزبەكستاندا دا تىركەلگەن. الەۋمەتتىك جەلىلەردە كۆادروبەر بولۋدى ۇيرەتەتىن جابىق توپتار مەن ارنايى ساباقتار پايدا بولدى”، – دەيدى مۇقايەۆ.
دەپۋتاتتىڭ ايتۋىنشا، بۇل بالالاردىڭ پسيحولوگياسى مەن الەۋمەتتىك دامۋىنا كەرى اسەرىن تيگىزىپ، شەكتەن شىعىپ بارادى.
“باتىس ەلدەرىندە بالالار ساباقتا سويلەسۋدىڭ ورنىنا جانۋارشا دىبىستايتىن بولدى. بۇل سۋبمادەنيەتكە ارنايى كەشتەر وتكىزىلىپ، كەرەك-جاراقتارى بيزنەس كوزىنە اينالىپ، جوعارى باعامەن ساتىلۋدا. بالالار ادامدىق قاسيەتتەردەن الىستاپ، جانۋار بولۋعا اۋەستەنىپ جاتىر. ەگەر بۇل ۇردىسكە توسقاۋىل قويماساق، ءبىر ۇرپاقتى جوعالتىپ الۋ ءقاۋپى بار”، – دەپ ەسكەرتتى ول.
مۇقايەۆتىڭ ايتۋىنشا، الەم ەلدەرى بۇل ماسەلەگە الاڭداۋشىلىق بىلدىرۋدە.
“بالالاردىڭ وسى سۋبمادەنيەتكە قىزىعۋشىلىعى ارتقانىن كورگەندە، اتا-انالار مەن قوعامعا بەلسەندى ارەكەت ەتۋ قاجەت. بۇل – تەك اتا-انانىڭ ەمەس، بۇكىل قوعام مەن مەملەكەتتىڭ ماسەلەسى. ءبىز الەۋمەتتىك جەلىلەردى باقىلاۋدا ۇستاپ، قۇقىقتىق توسقاۋىل قويۋىمىز كەرەك. رەسەيدە زاڭ قابىلداۋ تالقىلانىپ جاتسا، وزبەكستاندا اتا-انا مىندەتىن دۇرىس ورىنداماعانى ءۇشىن ايىپپۇل سالۋ قاراستىرىلۋدا. قازاقستاندا دا قۇزىرلى ورگاندار بۇل ماسەلەگە كەشەندى شارالار قابىلداۋى ءتيىس”، – دەپ تۇيىندەدى دەپۋتات.
