Komısıanyń otyrysynda «Ashyq úkimet» portalyn jáne memlekettik organdardyń ınternet resýrstarynyń biryńǵaı platformasyn damytý máseleleri talqylandy.
Búginde 17 mınıstrlik, 54 Komıtet jáne 17 jergilikti atqarýshy organ ınternet-resýrstardyń biryńǵaı platformasyna kóshti.
Jıynda Sıfrlyq damý, ınovasıalar jáne aeroǵarysh ónerkásibi vıse-mınıstri Áset Turysov ınternet-portaldardyń jumysyn jaqsartý boıynsha qandaı jumystar istelip jatqanyn baıandady. Onyń aıtýynsha, memlekettik organdardyń jańalyqtaryn, anyqtamalyq aqparattardy, qujattardy, NQA-lardy basqa resýrstarǵa aýyspaı-aq biryńǵaı platformadan alýǵa bolady.
– MO IRBP-da memlekettik organdardyń barlyq saıttaryn biriktirip, aqparat alý men ózara áreket etý biryńǵaı terezesine aınaldy. Qurylymy jańartylǵan biryńǵaı dızaın, yńǵaıly navıgasıa jáne ońaı aqparat berýdi, izdeýdi jeńildetedi. «Ashyq úkimet» portaly boıynsha júıeni turaqtandyrý, portaldyń jumysyn jaqsartý boıynsha aýqymdy jumys istedik. Barlyq server bir platformaǵa biriktirildi. Búginde portal jaqsy jumys istep tur, burynǵydaı tehnıkalyq aqaýlar joq, – dedi vıse-mınıstr.
Spıkerdiń orys tilindegi baıandamasyn estigen Aıda Balaeva memlekettik tilde sóıleý kerek ekenin aıtyp, eskertý jasady.
– Aýqymdy jumys istelgen. Dese de barlyǵyn bólek tanystyrýymyz kerek. Nátıjesinde tehnıkalyq aqaýlar bar ma, joq pa ekenin, bul jumystardyń tıimdiligin baıqaımyz. Halyq eshqandaı tehnıkalyq qıyndyq kórmeýi kerek. Memlekettik tildegi aqparatty kóbeıtýimiz kerek. Óıtkeni qazir aýdıtorıa aqparatty memlekettik tilde qoldanyp otyr. Endigi jyly memlekettik organdardyń ınternet-platformasyndaǵy qazaq tildi aqparattyń sapasyna kóńil bóletin bolamyz. Óıtkeni orys tilinen jasalǵan aýdarma sapasyz. Aqparattyń maǵynasy joǵalyp ketedi, al ol óte tıimsiz. Ekinshi másele – múmkindigi shekteýli adamdarǵa aqparattyń memlekettik tilde qoljetimdiligi. Osyǵan mán beretin bolamyz. Mınıstrliktiń endigi jylǵy jumysynyń strategıalyq josparynda naqty joba retinde osy jumys qolǵa alynady. Kózi kórmeıtin, qulaǵy estimeıtin jandarǵa aqparatty jetkizý máselesi áli kúnge deıin jolǵa qoıylmaǵan, – dedi mınıstr.
