كوميسسيانىڭ وتىرىسىندا «اشىق ۇكىمەت» پورتالىن جانە مەملەكەتتىك ورگانداردىڭ ينتەرنەت رەسۋرستارىنىڭ ءبىرىڭعاي پلاتفورماسىن دامىتۋ ماسەلەلەرى تالقىلاندى.
بۇگىندە 17 مينيسترلىك، 54 كوميتەت جانە 17 جەرگىلىكتى اتقارۋشى ورگان ينتەرنەت-رەسۋرستاردىڭ ءبىرىڭعاي پلاتفورماسىنا كوشتى.
جيىندا سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسەت تۇرىسوۆ ينتەرنەت-پورتالداردىڭ جۇمىسىن جاقسارتۋ بويىنشا قانداي جۇمىستار ىستەلىپ جاتقانىن باياندادى. ونىڭ ايتۋىنشا، مەملەكەتتىك ورگانداردىڭ جاڭالىقتارىن، انىقتامالىق اقپاراتتاردى، قۇجاتتاردى، نقا-لاردى باسقا رەسۋرستارعا اۋىسپاي-اق ءبىرىڭعاي پلاتفورمادان الۋعا بولادى.
– مو يربپ-دا مەملەكەتتىك ورگانداردىڭ بارلىق سايتتارىن بىرىكتىرىپ، اقپارات الۋ مەن ءوزارا ارەكەت ەتۋ ءبىرىڭعاي تەرەزەسىنە اينالدى. قۇرىلىمى جاڭارتىلعان ءبىرىڭعاي ديزاين، ىڭعايلى ناۆيگاسيا جانە وڭاي اقپارات بەرۋدى، ىزدەۋدى جەڭىلدەتەدى. «اشىق ۇكىمەت» پورتالى بويىنشا جۇيەنى تۇراقتاندىرۋ، پورتالدىڭ جۇمىسىن جاقسارتۋ بويىنشا اۋقىمدى جۇمىس ىستەدىك. بارلىق سەرۆەر ءبىر پلاتفورماعا بىرىكتىرىلدى. بۇگىندە پورتال جاقسى جۇمىس ىستەپ تۇر، بۇرىنعىداي تەحنيكالىق اقاۋلار جوق، – دەدى ۆيسە-مينيستر.
سپيكەردىڭ ورىس تىلىندەگى بايانداماسىن ەستىگەن ايدا بالايەۆا مەملەكەتتىك تىلدە سويلەۋ كەرەك ەكەنىن ايتىپ، ەسكەرتۋ جاسادى.
– اۋقىمدى جۇمىس ىستەلگەن. دەسە دە بارلىعىن بولەك تانىستىرۋىمىز كەرەك. ناتيجەسىندە تەحنيكالىق اقاۋلار بار ما، جوق پا ەكەنىن، بۇل جۇمىستاردىڭ تيىمدىلىگىن بايقايمىز. حالىق ەشقانداي تەحنيكالىق قيىندىق كورمەۋى كەرەك. مەملەكەتتىك تىلدەگى اقپاراتتى كوبەيتۋىمىز كەرەك. ويتكەنى ءقازىر اۋديتوريا اقپاراتتى مەملەكەتتىك تىلدە قولدانىپ وتىر. ەندىگى جىلى مەملەكەتتىك ورگانداردىڭ ينتەرنەت-پلاتفورماسىنداعى قازاق ءتىلدى اقپاراتتىڭ ساپاسىنا كوڭىل بولەتىن بولامىز. ويتكەنى ورىس تىلىنەن جاسالعان اۋدارما ساپاسىز. اقپاراتتىڭ ماعىناسى جوعالىپ كەتەدى، ال ول وتە ءتيىمسىز. ەكىنشى ماسەلە – مۇمكىندىگى شەكتەۋلى ادامدارعا اقپاراتتىڭ مەملەكەتتىك تىلدە قولجەتىمدىلىگى. وسىعان ءمان بەرەتىن بولامىز. مينيسترلىكتىڭ ەندىگى جىلعى جۇمىسىنىڭ ستراتەگيالىق جوسپارىندا ناقتى جوبا رەتىندە وسى جۇمىس قولعا الىنادى. كوزى كورمەيتىن، قۇلاعى ەستىمەيتىن جاندارعا اقپاراتتى جەتكىزۋ ماسەلەسى ءالى كۇنگە دەيىن جولعا قويىلماعان، – دەدى مينيستر.
