– «Qoǵamdyq baqylaý týraly» zań jobasynyń maqsaty jalpy qoǵamdyq baqylaý júıesiniń quqyqtyq negizin qurý bolýy tıis degen ortaq pikirge keldik. Ol úshin birqatar ádis usynylyp otyr. Uǵymdyq apparatty anyqtaý. Atap aıtqanda, qoǵamdyq baqylaý, qoǵamdyq baqylaý obektileri men sýbektileri, qoǵamdyq baqylaý nysandary, qoǵamdyq baqylaýdy júzege asyrý kezindegi múddeler qaqtyǵysy jáne qoǵamdyq baqylaý nátıjeleri boıynsha usynymdar uǵymdary aıqyndalatyn bolady, – dedi Balaeva.
Mınıstr atap ótkendeı, bul rette nysandy memlekettik organdardy, jergilikti memlekettik basqarý organdaryn, kvazımemlekettik sektor sýbektilerin aıqyndaý usynylady.
– Sýbektiler-korporatıvtik qorlardy qospaǵanda, ózderiniń jarǵylaryna sáıkes qoǵamdyq baqylaýdy júzege asyratyn jáne ÚEU derekqoryna engizilgen komersıalyq emes uıymdar, – dedi Aıda Balaeva.
Jıynda mınıstr maqsat pen ustanymdardy anyqtaý qajettiligi týraly da aıtty. Bul rette adamnyń jáne azamattyń konstıtýsıalyq quqyqtaryn, bostandyqtary men zańdy múddelerin saqtaý; jarıalylyq, ashyqtyq, zańdylyq qoǵamdyq baqylaýdy júzege asyrý kezinde qatysý eriktiligi; qoǵamdyq baqylaý júrgizý kezinde qoǵamdyq baqylaý obektileriniń, sýbektileriniń de zańsyz aralasýyna jol bermeý; qoǵamdyq baqylaý sýbektileriniń táýelsizdigi, obektıvtiligi keńinen sóz boldy.
– Sýbektiler men obektilerdiń quqyqtary men mindetterin anyqtaý. Máselen, qoǵamdyq baqylaý sýbektileri sarapshylardy tartýǵa, saraptamalyq komısıalar men qoǵamdyq monıtorıń toptaryn qurýǵa, sondaı-aq aqparat suratýǵa, dybys-beıne jazý tehnıkasy quraldaryn paıdalanýǵa, beıne jáne sýretke túsirýge, sondaı-aq qoǵamdyq baqylaý obektileriniń áreketterine nemese áreketsizdigine shaǵymdanýǵa quqyly bolady, – dedi Aıda Balaeva.
Búginde qoǵamdyq baqylaýdy júzege asyrý úshin negizderdi belgileý, ony júrgizý tártibi jáne usynymdardy qaraý tártibiniń negizin qalyptastyrý da mańyzdy. Bul daıynda mınısr:
– Mysaly, KEU-nyń jeke bastamasy, azamattardyń nemese uıymdardyń nemese obektiniń ózi qoǵamdyq baqylaý obektisine barmaı-aq qoǵamdyq monıtorıń júrgizýge negiz bola alady. Monıtorıń qorytyndylary boıynsha qoǵamdyq baqylaý sýbektisi tıisti qoǵamdyq keńeske nemese qoǵamdyq baqylaý obektisine usynymdar jibere alady. Qoǵamdyq tyńdaýlar sıaqty qoǵamdyq baqylaýdyń mundaı nysanyn barlyq azamat úshin ashyq etý jáne kez kelgen azamatqa qoǵamdyq tyńdaý taqyryby boıynsha usynystar aıtý múmkindigi usynylady, – dedi.
Balaeva Almatyǵa jasaǵan saparynyń basty maqsaty bilikti saraptamalyq pikirdi tyńdaý ekenin aıtty.
– Prezıdent qol qoımaǵan kez kelgen zań jobasy tıisti ózgeristerge quqyly ekeni túsinikti. Sondyqtan búgingi saparymnyń basty maqsaty – bilikti saraptamalyq pikirdi tyńdaý. Qoǵamdyq qatynastar máselelerinde sizde jetkilikti tájirıbe bar ekenine senimdimin, – dedi mınıstr qatysýshylarǵa.
