Balalar balabaqshaǵa 31 tamyzǵa deiin qabyldanady. Al vaýcherlik qarjylandyrý júiesi engizilgen óńirlerde 1 shildede bastalady, dep habarlaidy Dalanews.kz.
Bul Taraz, Túrkistan, Shymkent, Oral, Astana, Semei, Óskemen, Jezqazǵan, Qaraǵandy, Pavlodar, Petropavl, Qostanai, Qonaev, Qosshy, Taldyqorǵan qalalaryna, sondai-aq, Baizaq, Saryaǵash, Jetisai, Sairam, Qazyǵurt jáne Maqtaaral aýdandaryna qatysty.
Vaýcher alý úshin:
- Kelisimdi 2 jumys kúni ishinde rastaý kerek. Vaýcher rastalmaǵan jaǵdaida ótinish eseptelmeidi, al ata-ana nemese balanyń zańdy ókili ony 28 kúntizbelik kún ishinde tek bir ret qaita qalpyna keltire alady.
- Balabaqshany tańdap, qujattardy jinap, kelisimshartty 5 jumys kúni ishinde rásimdeý qajet. Eger vaýcherden bas tartsa, kezek joiylady.
Aita keteiik, qalaǵan balabaqshada bos oryn bolmasa, ata-ana balany kútý paraǵyna tirkei alady. Bos oryn paida bolǵan jaǵdaida jeke kabinetke jańa habarlama jiberiledi.
Qalǵan óńirlerde jas erekshelikteri boiynsha toptardy jasaqtaý 1 tamyzda bastalady. Bos oryn týraly habarlamalar aldymen kezekte turǵandarǵa jiberiledi.
Ata-anaǵa joldamany rastaýǵa nemese odan bas tartýǵa 2 kún beriledi. Eger joldama rastalsa, 5 jumys kúni ishinde qujattardy tapsyryp, kelisimshart jasaidy. Qajet bolǵan jaǵdaida joldamany 30 kúntizbelik kúnge deiin bir ret uzartýǵa bolady.
Qujattar tolyq usynylmasa, merzimi ótip ketken bolsa nemese ekpe almaǵan balalar sany ruqsat etilgen mólsherden asyp ketse, balabaqsha qujattardy qabyldaýdan bas tartýǵa quqyly. Qujattardy aldyn ala tekserip, jeke kabinettegi habarlamalardy qadaǵalap otyrý qajet.
