Ortalyq komýnıkasıa qyzmetinde osy týraly egjeı-tegjeıli aıtqan dáriger, profılaktıkalyq medısına akademıasynyń prezıdenti, Amerıkandyq densaýlyq qaýymdastyǵynyń múshesi Almaz Sharman halyqty vaksına alýǵa shaqyrdy dep habarlaıdy Dalanews.kz.
Onyń aıtýynsha karantındik sharalar jeńildetilgen jaǵdaıda vaksınasıalaý prosesi koronavırýstyń asa juqpaly, vaksınaǵa tózimdi jańa shtamdarynyń qalyptasýyna ákeledi. Bul búginde ázirlengen tıimdi vaksınalar túrindegi seleksıalyq qysym jaǵdaıynda vırýstyń tirshilik etýiniń tabıǵı prosesi.
"Azamattardyń basym bóligi – shamamen 80 paıyzy vaksına almaıynsha karantındi jeńildetýge bolmaıdy. Áıtpese, jańa tolqyndar, jańa indettermen udaıy kúresetin bolamyz. Karantındi álsiretsek vaksınalarǵa tózimdi jańa nusqalardyń - joǵary juqpaly koronavırýs shtamdary paıda bolady", – dedi ol.
Mamannyń pikirinshe, vaksınasıasyz biz árqashan qatań karantın jaǵdaıynda ómir súretinimizdi túsiný kerekpiz.
"İndetke qarsy sharalardy jeńildetýdi koronavırýsqa qarsy ekpe jasatyp qana qol jetkizemiz. Ókinishke qaraı, Qazaqstan azamattarynyń 80 paıyzy vaksınanyń qajetti dozasyn alǵan joq!
Kóptegen adamdar popýlıserdiń aıtqanyna erip júr, aıta keteıik, olar vaksınasıaǵa qarsy áreketterimen jaqsy tabys tabýda. Alaıda, «qalaı?» degen zańdy suraq týyndaıdy. Kóptegen otandastarynyń densaýlyǵy men ómirin qıý arqyly...
Mundaılar vaksınalardyń qaýipsizdigi men oryndylyǵyna kúmán keltire otyryp, shyndyqty anyqtaýǵa tyryspaıdy, birbetkeı, tek birjaqty baǵa beredi. Aınalada qarama-qaıshy aqparat kóp bolǵan kezde densaýlyǵyńyzǵa qatysty utymdy sheshim qabyldaý ońaı emes.
Men barshańyzdy vaksınasıa týraly oıdan shyǵarylǵan jáne negizsiz qaýesetterdiń ornyna ǵylymı shyndyqqa senýge shaqyramyn", – dedi Sharman.
Mamandar vaksına indetten 100% qorǵamasa da, aýrý aǵymynyń aýyr bolýynan saqtaıdy deıdi. Dárigerlerdiń aıtýynsha, qaýipti derttiń quryǵyna ilingender- ekpe almaǵandar.
