Qazaqstan qor birjasynyń saitynda "Báiterek" ulttyq basqarýshy holdinginiń 2026 jyldyń alǵashqy jartyjyldyǵyna arnalǵan qarjylyq esebi jariialandy. Qujatty KPMG halyqaralyq aýditorlyq kompaniiasy teksergen, dep habarlaidy dalanews.kz.
Esepti kezeńde holdingtiń taza paidasy 263,9 mlrd teńgege jetti. Byltyrǵy sáikes kezeńde bul kórsetkish 200,5 mlrd teńge bolǵan. Osylaisha, bir jyl ishinde taza paida 63,4 mlrd teńgege artqan.
Holding aktivteriniń jalpy kólemi 20,9 trln teńgeden asty. Jyl basynan beri bul kórsetkish shamamen 2 trln teńgege kóbeigen. Qarajattyń basym bóligi klientterge berilgen nesielerge tiesili — olardyń kólemi 9 trln teńgege jýyqtaidy. Al Qazaqstannyń Damý banki júrgizetin lizingtik operatsiialardyń mólsheri 2,7 trln teńgeni qurady.
Bereke Bank, burynǵy «Sberbank Qazaqstan», holding quramynan tolyq shyǵarylǵan. Bank 2025 jyldyń qazanynda sheteldik investorǵa satylǵan edi. Qazir «Báiterek» qurylymynda jeti uiym bar: Qazaqstannyń Damý banki, Qazaqstannyń eksporttyq-kredittik agenttigi, «Damý» qory, Qazaqstan Investment Corporation, «Otbasy bank», Qazaqstan turǵyn úi kompaniiasy jáne Agrarlyq nesie korporatsiiasy.
Taza paida óskenimen, holdingtiń operatsiialyq qyzmetten túsken aqsha aǵyny 885 mlrd teńge kóleminde minýsqa ketken. Buǵan jańa nesielerdiń kóptep berilýi áser etken. Alty aidyń ishinde holding shamamen 1,1 trln teńge kóleminde jańa nesie usynǵan.
Bul qarajatty tartý úshin holding negizinen obligatsiialar shyǵarǵan. Qazirgi ýaqytta onyń balansyndaǵy qaryzdyq baǵaly qaǵazdardyń kólemi 8,2 trln teńgege jetip, mindettemelerdiń eń iri bóligin qurap otyr.
