“Qazaqtelekom” kompaniiasynyń 2025 jylǵa arnalǵan shoǵyrlandyrylǵan qarjylyq esebinde top-menedjmentke tólengen syiaqy kólemi jariialandy, dep habarlaidy dalanews.kz.
QAMS qaýymdastyǵy taratqan málimetke sáikes, negizgi basqarýshy quramǵa berilgen tólemder jalpy jáne ákimshilik shyǵystar qatarynda kórsetilgen. Qujatta 2025 jyly bul baǵytqa 752,2 million teńgeden astam qarjy jumsalǵany aitylǵan.
Osylaisha, kompaniiany basqaryp otyrǵan Baǵdat Mýsin bastaǵan top-menedjerlerdiń jyldyq syiaqysy 752 million teńgeden asqan.
Qarjylyq esepke súiensek, 2025 jyldyń qorytyndysynda kompaniianyń jalpy kirisi 587,2 milliard teńgeni quraǵan. Operatsiialyq paidasy 94,5 milliard teńge bolsa, taza paida kólemi 147 milliard teńgege jetken.
Sonymen birge esepte kompaniianyń qaryzdyq mindettemeleri de kórsetilgen. Atap aitqanda, qysqa merzimdi nesieler men jetkizýshiler aldyndaǵy bereshek kólemi 2025 jyldyń sońynda shamamen 300 milliard teńgeni quraǵan.
