Baǵanashyldaǵy balalar bılikke taǵy úndeý jasady

Kórkem Aldabergenova 30 shil. 2025 11:26

Almatydaǵy balalar úıinde turatyn balalar jóndeý jumystary kezinde bir-birinen ajyrap qalamyz ba dep alańdap otyr. Olar bul týraly áleýmettik jelide jarıalanǵan málimdemede aıtty, dep habarlaıdy Dalanews.kz.

Beıneúndeýde tárbıelenýshiler jergilikti bılikke qaıyrylyp, birge qaldyrýdy suraıdy.

"Buǵan deıin jóndeý kezinde eshkimdi bóle-jarmaımyz dep ýáde berdińizder. Al qazir basqa aqparat estip jatyrmyz. Bizde eki korpýs bar, onyń biri bos tur. Nege aldymen sony jóndep, bárimizdi sonda kóshirmeske? Keıin negizgi ǵımaratqa rekonstrýksıa jasaýǵa bolady. Eger shyn máninde tıimdi sheshim izdeseńizder, bizdiń usynys eń utymdysy", - deıdi olar.

Balalardyń aıtýynsha, jýyrda mekemege Prezıdent ákimshiliginen ókilder kelgen. Sol kezde jóndeý jumystary kelesi jyldyń kókteminen erte bastalmaıtyny jáne tárbıelenýshilerdi bos turǵan korpýsqa kóshirý nemese barlyǵyna otbasylyq úlgidegi úıler salý josparlanǵany aıtylǵan.

Eske salaıyq, buǵan deıin prezıdent Qasym-Jomart Toqaev Almatyda jetim balalardy Qonaevqa kúshtep kóshirýdi toqtatýdy tapsyrǵan bolatyn.

№1 oblystyq balalar úıiniń tárbıelenýshileri mekemeniń Almatydan Qonaevqa kóshirilip jatqanyna shaǵymdanǵan bolatyn. Qoǵam belsendileri Almatynyń elıtaly aýdany – Baǵanashyldaǵy qundy jer telimi belgisiz qurylys kompanıalarynyń kózine túsip, olar bul aýmaqqa turǵyn úı keshenin salǵysy keletinin málimdegen edi.

Keıinirek Almaty oblysynyń ákimi Marat Sultanǵazıev №1 oblystyq balalar úıiniń tárbıelenýshileri Almatydan tys jerge kóshirilmeıtinin aıtty. Ákimdik ókilderi «qazirgi ýaqytta qalada oqyp jatqan tárbıelenýshiler oqýyn burynǵydaı jalǵastyra beredi, al jańadan qabyldanǵan balalar Qonaev qalasyna ornalastyrylady» dep málimdedi. Aımaq basshysy sol kezde «Balalar Almatyda qalǵysy keletinin bildirdi, óıtkeni orta aýystyrý olardyń beıimdelýi men áleýmettenýine keri áser etýi múmkin. Bul faktor sheshim qabyldaýda mańyzdy ról atqardy» dep túsindirdi.