Ulybritaniialyq BAE Systems kompaniiasy Air Astana-daǵy 6,86% úlesin tolyq satýdy josparlap otyr. Bul paket naryqtyq baǵadan shamamen 15% tómen, iaǵni bir depozitarlyq qolhat úshin shamamen 5,1 dollar deńgeiinde usynylýy múmkin. 18 naýryzdaǵy saýda qorytyndysy boiynsha, Air Astana aktsiialary tarihi eń tómengi deńgeige deiin quldyrap, 5,74%-ǵa (707,6 teńgege deiin) tómendegen.
BAE Systems-tiń Air Astana kapitalynan shyǵýy otandyq áýe kompaniiasynyń aldaǵy kórsetkishteri men qyzmetine qalai áser etedi? Bul saýalǵa Qazaq Expert Club teń quryltaishysy, ekonomist Baýyrjan Shýrmanov jaýap berdi, dep habarlaidy Dalanews.kz.
Shýrmanovtyń aitýynsha, bul – 20 jyldan astam ýaqytqa sozylǵan investitsiialyq kezeńniń aiaqtalýy.
"BAE Systems Air Astana qurylý kezeńinde negizgi seriktes boldy. Kompaniianyń korporativtik basqarý júiesin qalyptastyrýǵa jáne halyqaralyq bedelin arttyrýǵa úlken úles qosty. IPO ótkennen keiin olardyń qatysýy strategiialyq mańyzyn joǵaltty", – deidi sarapshy.
Onyń aitýynsha, bul jaǵdai kompaniiada másele bar degendi bildirmeidi, bul – investordyń óz úlesin satyp, jobadan shyǵýy. Alaida shyǵý tásili mańyzdy.
"Úlken kólemdegi aktsiiany jeńildikpen satý qysqa ýaqytta aktsiia baǵasyna qysym túsiredi, iaǵni baǵa tómendeýi múmkin. Sonymen qatar naryqta aktsiia sany kóbeiedi, sebebi bul úles negizinen iri investorlarǵa usynylady", – dep túsindirdi Shýrmanov.
Sonymen qatar ekonomistiń pikirinshe, bul mámile Air Astana-nyń operatsiialyq qyzmetine tikelei áser etpeidi. Kompaniia jańa kapital tartpaidy, al basqarý qurylymy ózgerissiz qalady.
"Degenmen bul jaǵdaidyń janama áserleri bar. Bir jaǵynan, kompaniia burynǵydai iri sheteldik investordan aiyrylady, al mundai investorlar ádette kompaniiaǵa syrtqy naryqta senim arttyratyn edi. Ekinshi jaǵynan, aktsiialardyń erkin satylatyn úlesi kóbeiedi. Bul – jańa investorlar úshin jaqsy múmkindik. Buǵan deiin aktsiialar az bolǵandyqtan kire almaǵan iri qorlar endi qyzyǵýshylyq tanytýy múmkin. Uzaq merzimde bul kompaniianyń investorlar quramyn jaqsartyp, ony naryqqa beiim, ashyq kompaniiaǵa ainaldyrady", – deidi sarapshy.
Shýrmanovtyń aitýynsha, BAE Systems-tiń shyǵýy Air Astana úshin dál bir osal kezeńge tuspa-tus kelip otyr. Qazir kompaniia Taiaý Shyǵystaǵy jaǵdai men Pratt & Whitney qozǵaltqyshtaryna qatysty máselelerge bailanysty tabys pen jumys kórsetkishteri jaǵynan qysym kórip otyr.
"Jalpy, naryqqa áseri ártúrli bolady. Qysqa merzimde – aktsiialardy jeńildikpen satý jáne olardyń naryqta kóbeiýi baǵaǵa keri áser etýi múmkin. Orta merzimde – jaǵdai turaqtalady, sebebi kompaniianyń negizgi qyzmeti ózgermeidi. Al uzaq merzimde – oń nátije bolýy yqtimal, eger aktsiialardyń erkin ainalymy artyp, jańa investorlar kelse jáne kompaniia ádil baǵalana bastasa", - dep túiindedi ekonomist.
