Árıne, tabıǵattyń alapat kúshine eshkim qarsy tura almasy belgili. Alaıda, sońǵy jyldardaǵy sý tasqyndarynyń arnasynan asyp, turǵyn úılerdi basyp qalǵanyna jergilikti atqarýshy bıliktiń beıǵamdyǵy sebepker ekenin mamandar jaqsy biledi. Ákim-qaralardyń júıeli jumys istemeýi, aldyn-ala josparlamaýy, qaýipti bile tura qam jasamaýy, bolashaqty baǵdarlamaı búgingi kúnniń máselelerimen ǵana bas qatyrýy – osyndaı jaǵdaılarǵa ákelip otyr. Jáne ol bolashaqta qaıtalana beredi.
[caption id="attachment_26039" align="aligncenter" width="709"]
Aqtóbedegi sý tasqyny[/caption]
Men qyzmet barysyna oraı apta saıyn oblys ákiminiń jınalysyna qatysamyn. Shyny kerek, basynda unamaıtyn. Óıtkeni, Batalov eshkimdi aıamaıdy. Betiń bar, júziń bar, basyń bar, jasyń bar demeıdi. Jumysyna salǵyrt qaraǵannyń bárin jurttyń aldynda soıyp salady. Jazyqty bolǵandyqtan bastary salbyrap, unjyrǵalary túsip turǵan el aǵalaryn kórip keıde aıap ketesiń. Birde ózine aıttym da: «Elge nege ursa beresiz?» - dep.
– Áı, Beısen! Sen ne bilesiń? Talap etpeseń, jumys qalaı júredi? El bárin bilip, kórip otyr. Elbasy bizge senip otyr. Biz sony aqtamasaq, uıat emes pe?! Sosyn, aıtshy, kimge kinásiz, jazyqsyz urystym? Men olardy jumystan ketireıin demeımin. Shırasyn deımin. Bilmese - úırensin, el aldyndaǵy jaýapkershiligin sezinsin deımin, – dep ózime shuqshıa qarady. Ákimniń ádildigin moıyndamasqa amal joq. Jumysyńdy jaqsy atqardyń ba, senen jaqsy adam joq. Arqańnan qaǵady, ataǵyn alyp beredi, jaǵdaıyńdy jasaıdy. Durys istemeısiń be, onda - DO SVIDANIA!
Ákimimdi maqtaıyn dep turǵam joq. Ol kisi meniń maqtaýyma muqtaj da emes. Qos ózenniń ortasynda turǵan Taldyqorǵandyqtar kóktemde tynysh uıyqtasa, ol – atqarýshy bıliktiń aldyn-ala josparlap, arnalardy ashyp, qaptalyn bekitip, saqadaı-saı turýynyń arqasy ekenin kóre tura aıtpasqa bolmaıdy. Týra qalanyń irgesinde aǵyp jatqan «kúndiz kúmis, túnde altyn» dep áspetteıtin Qaratalymyz 4-5 jyl buryn asaý minez tanytyp, irgesindegi Erkin aýyly men Rezıdensıany basyp ketetindeı qaharlanǵan. Sonda marqum Sáken Jylqaıdarov bastaǵan qala basshylarynyń túnimen arpalysyp, sýdyń betin qaıtarǵanyna, ony jurttyń sezbeı qalǵanyna da kýá bolǵan edim.
Osy Qaratal ózeni burynda kóktemde tómendegi aýyldardy basyp, jaıylyp ketetin. Soǵan eki jyl buryn arnaıy aýyr tehnıkalar aldyryp, bálenbaı shaqyrym tereń kanaldar qazyp, sý búginde emin-erkin Balqashqa quıylyp jatyr. «Bir oqpen eki qoıandy aldy» degen osy. Birinshiden, kóktemde aýyl turǵyndary tynysh uıyqtaıdy. Ekinshiden, Balqashtyń kóli tolyp keledi. Úshinshiden, osy kanaldardyń arqasynda bizdiń jigitter alysqa barmaı, Taldyqorǵannyń irgesinen balyq aýlaıtyn kúnge jetti.
«Júıeli, josparly jumys isteýdi Batalovtan úırensin» desem, basqa ákimder renjip júrer. Biraq, tabıǵatqa jaba bermeı, apattyń aldyn alýdy qarastyrsa degen oı ǵoı bizdiki.
P.S. Jazarymdy jazyp aldym da, «Bárin kórgen, bárin biletin Berdibek Saparbaev aǵam nege qamsyz qaldy eken?» dep oılanyp otyrǵan...
Beısen Quranbektiń jelidegi jazbasynan alyndy.
