«Áziret Sultan» qoryq-mýzeiiniń 40 jyldyǵy aiasynda tarihi kitaptardyń tusaýy kesildi
Qoryq-mýzeidiń 40 jyldyǵyna arnalǵan «Uly Jibek joly boiyndaǵy ortaǵasyrlyq qalalar» halyqaralyq ǵylymi-praktikalyq konferentsiiasy aiasynda ótken tarihi kitaptardyń tusaýkeser rásimin «Áziret Sultan» memlekettik tarihi-mádeni qoryq-mýzeiiniń direktory Nurbolat Ahmetjanov quttyqtaý sózben ashyp berip, QR Mádeniet jáne sport ministrliginiń Zań departamentiniń basqarma basshysy Seraly Tajihanov, Halyqaralyq qazaq-túrik ýniversitetiniń rektory Bolatbek Abdrasilov, Túrkistan oblysynyń Mádeniet jáne tilderdi damytý basqarmasynyń Mádeniet jáne óner bóliminiń basshysy Ǵaliia Sharafieva lentasyn qidy.
Túrkistan jazirasynyń qysh ydystary
Bul aqparattyq ǵylymi tanymdyq albom – katalogta «Áziret Sultan» memlekettik tarihi-mádeni qoryq mýzeii qoryna 40 jyldan astam ýaqyt boiy jinaqtalǵan, Túrkistan aimaǵyndaǵy kóne qalalar men qonystar oryndarynda júrgizilgen arheologiialyq zertteý-qazba jumystary barysynda tabylǵan qysh ydystardyń erekshe úlgileri berilgen. Albom - katalog qyshtan jasalǵan qol óner buiymdarynyń birqatar taqyryptaryn ashyp tarqatýǵa, keramikanyń hronologiialyq damý kezeńderin naqtylaýǵa, jergilikti keramika óneriniń damý tarihynyń ózge aimaqtarmen bailanysyn anyqtaýda mýzei qyzmetkerleri men bolashaq arheolog mamandarǵa kómekshi qural retinde usynylady.
Zergerlik buiymdar toptamasy
Katalogta Qazaqstan Respýblikasy «Áziret Sultan» memlekettik tarihi-mádeni qoryq-mýzeii qorynda saqtalǵan zergerlik áshekei buiymdar toptamasy berilgen. Katalogta zergerlik áshekei buiymdardyń jasalý tehnologiiasyn, ádis-tásilderin sipattai otyryp, zergerlik áshekeilerdiń qoldanylýy men erekshelikterine toqtalady. Katalog mýzei qyzmetkerlerine jáne kópshilik oqyrmanǵa arnalǵan.
100 ańyz
Kitapta ár túrli kezeńde hatqa túsken, sondai-aq el ishinde aýyzsha aitylyp kelgen halqymyzdyń ańyz-áfsanalary jinaqtalǵan. Kitap óziniń derektiligimen, buryn sońdy jariialanbaǵan tyń málimetterimen qundy. Jinaq ǵalym-mamandarǵa, oqytýshylarǵa, joǵary oqý ornynyń stýdentteri men jalpy kópshilik qaýymǵa arnalady.
Jetpis hikmet
Áýlielerdiń sultany Qoja Ahmet Iasaýi babamyzdyń sońynda qalǵan telegei-teńiz murasy búkil adam balasyna ortaq rýhani qazyna. Sol rýhani qazynadan alynǵan jetpis hikmet «Áziret Sultan» qoryq-mýzeiine kelýshiler men jalpy oqyrmandarǵa latyn álipbiinde jol tartyp otyr.
40 jyldyq albom
Kitapta «Áziret Sultan» memlekettik tarihi-mádeni qoryq-mýzeiiniń 40 jyldyq damý tarihyndaǵy muraǵattyq derekter men fotosýretter qamtylǵan. Jinaq mýzei qyzmetkerlerine, mádeniet mekemelerine jáne kópshilik oqyrmanǵa arnalǵan.
