قورىق-مۋزەيدىڭ 40 جىلدىعىنا ارنالعان «ۇلى جىبەك جولى بويىنداعى ورتاعاسىرلىق قالالار» حالىقارالىق عىلىمي-پراكتيكالىق كونفەرەنسياسى اياسىندا وتكەن تاريحي كىتاپتاردىڭ تۇساۋكەسەر ءراسىمىن «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ قۇتتىقتاۋ سوزبەن اشىپ بەرىپ، ق ر مادەنيەت جانە سپورت مينيسترلىگىنىڭ زاڭ دەپارتامەنتىنىڭ باسقارما باسشىسى سەرالى تاجيحانوۆ، حالىقارالىق قازاق-تۇرىك ۋنيۆەرسيتەتىنىڭ رەكتورى بولاتبەك ابدراسيلوۆ، تۇركىستان وبلىسىنىڭ مادەنيەت جانە تىلدەردى دامىتۋ باسقارماسىنىڭ مادەنيەت جانە ونەر ءبولىمىنىڭ باسشىسى عاليا شارافييەۆا لەنتاسىن قيدى.
تۇركىستان جازيراسىنىڭ قىش ىدىستارى
بۇل اقپاراتتىق عىلىمي تانىمدىق البوم – كاتالوگتا «ازىرەت سۇلتان» مەملەكەتتىك تاريحي-مادەني قورىق مۋزەيى قورىنا 40 جىلدان استام ۋاقىت بويى جيناقتالعان، تۇركىستان ايماعىنداعى كونە قالالار مەن قونىستار ورىندارىندا جۇرگىزىلگەن ارحەولوگيالىق زەرتتەۋ-قازبا جۇمىستارى بارىسىندا تابىلعان قىش ىدىستاردىڭ ەرەكشە ۇلگىلەرى بەرىلگەن. البوم - كاتالوگ قىشتان جاسالعان قول ونەر بۇيىمدارىنىڭ ءبىرقاتار تاقىرىپتارىن اشىپ تارقاتۋعا، كەراميكانىڭ حرونولوگيالىق دامۋ كەزەڭدەرىن ناقتىلاۋعا، جەرگىلىكتى كەراميكا ونەرىنىڭ دامۋ تاريحىنىڭ وزگە ايماقتارمەن بايلانىسىن انىقتاۋدا مۋزەي قىزمەتكەرلەرى مەن بولاشاق ارحەولوگ ماماندارعا كومەكشى قۇرال رەتىندە ۇسىنىلادى.
زەرگەرلىك بۇيىمدار توپتاماسى
كاتالوگتا قازاقستان رەسپۋبليكاسى «ازىرەت سۇلتان» مەملەكەتتىك تاريحي-مادەني قورىق-مۋزەيى قورىندا ساقتالعان زەرگەرلىك اشەكەي بۇيىمدار توپتاماسى بەرىلگەن. كاتالوگتا زەرگەرلىك اشەكەي بۇيىمداردىڭ جاسالۋ تەحنولوگياسىن، ادىس-تاسىلدەرىن سيپاتتاي وتىرىپ، زەرگەرلىك اشەكەيلەردىڭ قولدانىلۋى مەن ەرەكشەلىكتەرىنە توقتالادى. كاتالوگ مۋزەي قىزمەتكەرلەرىنە جانە كوپشىلىك وقىرمانعا ارنالعان.
100 اڭىز
كىتاپتا ءار ءتۇرلى كەزەڭدە حاتقا تۇسكەن، سونداي-اق ەل ىشىندە اۋىزشا ايتىلىپ كەلگەن حالقىمىزدىڭ ءاڭىز-افسانالارى جيناقتالعان. كىتاپ ءوزىنىڭ دەرەكتىلىگىمەن، بۇرىن سوڭدى جاريالانباعان تىڭ مالىمەتتەرىمەن قۇندى. جيناق عالىم-ماماندارعا، وقىتۋشىلارعا، جوعارى وقۋ ورنىنىڭ ستۋدەنتتەرى مەن جالپى كوپشىلىك قاۋىمعا ارنالادى.
جەتپىس حيكمەت
اۋليەلەردىڭ سۇلتانى قوجا احمەت ياساۋي بابامىزدىڭ سوڭىندا قالعان تەلەگەي-تەڭىز مۇراسى بۇكىل ادام بالاسىنا ورتاق رۋحاني قازىنا. سول رۋحاني قازىنادان الىنعان جەتپىس حيكمەت «ازىرەت سۇلتان» قورىق-مۋزەيىنە كەلۋشىلەر مەن جالپى وقىرماندارعا لاتىن الىپبيىندە جول تارتىپ وتىر.
40 جىلدىق البوم
كىتاپتا «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ 40 جىلدىق دامۋ تاريحىنداعى مۇراعاتتىق دەرەكتەر مەن فوتوسۋرەتتەر قامتىلعان. جيناق مۋزەي قىزمەتكەرلەرىنە، مادەنيەت مەكەمەلەرىنە جانە كوپشىلىك وقىرمانعا ارنالعان.
