Ázerbaijan prezidenti Ilham Áliev Resei men Ázerbaijan arasyndaǵy qarym-qatynastyń tolyq qalypqa kelgenin málimdedi, dep habarlaidy dalanews.kz.
Bul týraly ol dúisenbi kúni ótken IV Shýsha jahandyq mediaforýmyna qatysýshylarmen kezdesýde aitty. Forýmnyń taqyryby – «Beibitshilikti ilgeriletýdegi medianyń missiiasy: shyndyqty qalpyna keltirý jáne senimdi jańǵyrtý».
Álievtiń aitýynsha, eki el arasyndaǵy qatynasta belgili bir qiyndyqtar bolǵanymen, bul kezeń artta qalǵan.
«Iá, qiyndyqtar boldy. Ony bárimiz bilemiz. Biraq eń mańyzdysy – bul kezeń artta qaldy. Meniń oiymsha, qarym-qatynas tolyqtai qalypqa keldi», – dedi Ázerbaijan basshysy.
Ol sondai-aq Ázerbaijannyń Reseimen seriktestikti joǵary baǵalaitynyn atap ótti.
Prezidenttiń sózinshe, eki el arasyndaǵy bailanys túrli deńgeide jalǵasyp jatyr. Atap aitqanda, úkimetter, úkimetaralyq komissiianyń teń tóraǵalary, syrtqy ister ministrlikteri jáne prezident ákimshilikteri turaqty túrde ózara is-qimyl júrgizýde.
«Sondyqtan bul baǵyttaǵy jumys jaqsy júrip jatyr dep oilaimyn. Biz buǵan qýanyshtymyz», – dedi Áliev.
Sonymen qatar, ol Reseidiń resmi ókilderi, onyń ishinde prezident Vladimir Pýtin de ekijaqty qarym-qatynastyń damý qarqynyna qatysty pikir bildirgenin aitty.
Álievtiń pikirinshe, Resei men Ázerbaijan arasyndaǵy bailanys tek ekijaqty format úshin ǵana emes, tutas óńir úshin de mańyzdy. Onyń aitýynsha, yntymaqtastyq dástúrli baǵyttarmen qatar jańa salalardy da qamtyp keledi.
Prezident kólik-logistika, saýda jáne gýmanitarlyq yntymaqtastyq eki el arasyndaǵy áriptestiktiń negizgi baǵyttary bolyp qala beretinin atap ótti.
