Qazaqstandyqtardyń 85,7%-y Prezident Qasym-Jomart Toqaevqa senetinin bildirdi. Bul 20 shilde men 6 tamyz aralyǵynda júrgizilgen áleýmettanýlyq zertteý nátijesinde belgili boldy, dep habarlaidy dalanews.kz.
Áleýmettanýlyq saýalnamany Demokratiia institýty júrgizgen. Zertteýge elimizdiń 17 oblysy jáne respýblikalyq mańyzy bar Astana, Almaty jáne Shymkent qalalarynan 18 jastan asqan 8 myń respondent qatysty.
Zertteý nátijesine sáikes, Prezidentke degen senim deńgeii 85,7%-dy qurady. Bul kórsetkishke «iá» jáne «iá deýge bolady» degen jaýaptar kirgen.
Prezidentke degen eń joǵary senim deńgeii 18-29 jas aralyǵyndaǵy jastar arasynda tirkeldi. Bul toptaǵy respondentterdiń 90,1%-y Memleket basshysyna senetinin bildirgen.
Respondentterdiń bilim deńgeii de senim kórsetkishine áser etetin faktorlardyń biri bolǵan. Bilimi tómendeý azamattar arasynda Prezidentke senim deńgeii 81,8% bolsa, joǵary bilimdi respondentter arasynda bul kórsetkish 89,7%-ǵa jetken.
Saýalnama barysynda qazaqstandyqtardyń eldiń damý baǵytyna kózqarasy da zerttelgen. Respondentterdiń 81,5%-y Qazaqstan durys baǵytta damyp keledi dep sanaidy.
Bul kórsetkish boiynsha da jastardyń úlesi joǵary. 18-29 jastaǵy respondentterdiń 85,4%-y eldiń damý baǵytyn qoldaitynyn aitqan. Al 60 jastan asqan azamattar arasynda bul kórsetkish 76,9%-dy quraǵan.
Joǵary bilimdi respondentterdiń 86%-y Qazaqstannyń damý baǵytyn durys dep baǵalaǵan.
Zertteý avtorlary Prezidentke degen senim men eldiń damý baǵytyn qoldaýǵa áser etetin negizgi faktorlardyń qatarynda azamattardyń jasy men bilim deńgeiin ataǵan. Sonymen qatar erler men áielderdiń, qala jáne aýyl turǵyndarynyń jaýaptarynda aitarlyqtai aiyrmashylyq bolmaǵan.
