Қазақстандықтардың 85,7%-ы Президент Қасым-Жомарт Тоқаевқа сенетінін білдірді. Бұл 20 шілде мен 6 тамыз аралығында жүргізілген әлеуметтанулық зерттеу нәтижесінде белгілі болды, деп хабарлайды dalanews.kz.
Әлеуметтанулық сауалнаманы Демократия институты жүргізген. Зерттеуге еліміздің 17 облысы және республикалық маңызы бар Астана, Алматы және Шымкент қалаларынан 18 жастан асқан 8 мың респондент қатысты.
Зерттеу нәтижесіне сәйкес, Президентке деген сенім деңгейі 85,7%-ды құрады. Бұл көрсеткішке «иә» және «иә деуге болады» деген жауаптар кірген.
Президентке деген ең жоғары сенім деңгейі 18-29 жас аралығындағы жастар арасында тіркелді. Бұл топтағы респонденттердің 90,1%-ы Мемлекет басшысына сенетінін білдірген.
Респонденттердің білім деңгейі де сенім көрсеткішіне әсер ететін факторлардың бірі болған. Білімі төмендеу азаматтар арасында Президентке сенім деңгейі 81,8% болса, жоғары білімді респонденттер арасында бұл көрсеткіш 89,7%-ға жеткен.
Сауалнама барысында қазақстандықтардың елдің даму бағытына көзқарасы да зерттелген. Респонденттердің 81,5%-ы Қазақстан дұрыс бағытта дамып келеді деп санайды.
Бұл көрсеткіш бойынша да жастардың үлесі жоғары. 18-29 жастағы респонденттердің 85,4%-ы елдің даму бағытын қолдайтынын айтқан. Ал 60 жастан асқан азаматтар арасында бұл көрсеткіш 76,9%-ды құраған.
Жоғары білімді респонденттердің 86%-ы Қазақстанның даму бағытын дұрыс деп бағалаған.
Зерттеу авторлары Президентке деген сенім мен елдің даму бағытын қолдауға әсер ететін негізгі факторлардың қатарында азаматтардың жасы мен білім деңгейін атаған. Сонымен қатар ерлер мен әйелдердің, қала және ауыл тұрғындарының жауаптарында айтарлықтай айырмашылық болмаған.
