Qabyldaýda oblys turǵyndaryn sýmen qamtý, jumysqa ornalastyrý, baspanamen qamtý, jer telimin bólý jáne taǵy basqa máseleler tolǵandyratyny málim boldy. Óńir basshysy qabyldaýǵa jazylǵan oblys turǵyndarynyń ótinishteri men usynystary boiynsha sheshimniń zańdy joldaryn túsindirdi.
Kelgen turǵyndarǵa árbir másele sheshimin tapqansha óz baqylaýynda bolatynyn aitty. Jeke qabyldaýǵa quqyq qorǵaý organdarynyń basshylary da qatysty. Ashyq pikir almasý ótip, kúrdeli túitkilderdiń túiini tarqatyldy.
«Halyq únine qulaq asatyn memleket» tujyrymdamasy men ashyqtyq qaǵidatyna sáikes ótken kezdesýde turǵyndar tarapynan ózekti máseleler qozǵaldy. Oblys basshysy Darhan Satybaldy barlyǵyn saraptai, saralai kele, barshasyna tolyqtai jaýabyn berdi.
Sheshimi bar máselelerge qatysty jaýabyn sol jerde berse, keibirin óziniń orynbasarlaryna men jaýapty basshylaryna tapsyrdy. Árbir usynys pen ótinish boiynsha tiisti jumys júretinin aitty.
– Azamattardyń ótinish-tilekteri, usynystary men talap-aryzdary eskerýsiz qalmaidy. Barlyq týyndaǵan máseleler zań sheńberinde sheshimin tabady, – dedi Darhan Satybaldy.
Turǵyn úi kezeginde turǵan Saryaǵash aýdanynyń turǵyny aýdannan beriletin baspanadan bas tartyp, oblys ortalyǵynan úi surady. Taǵy biri jyldar boiy sheshimin tappaǵan jer máselesine núkte qoiý týraly ótinishin jetkizdi. Qabyldaýda ótinish ielderine sottyń sheshimimen kelispegen jaǵdaida, áli zań kúshine enbei turyp, appeliatsiialyq tártipte shaǵymdanýǵa bolatyny túsindirildi.
Darhan Satybaldy túrkistandyqtardyń usynys-shaǵymdaryn jeke baqylaýyna alyp, jaýapty tulǵalarǵa ár azamattyń máselesin jiti taldap, qysqa merzimde zań aiasynda sheshýdi tapsyrdy.
Qoǵamdyq qabyldaýǵa jazylǵan ózge de tulǵalar túrli áleýmettik máselelerdi kóterdi. Aita keteiik, oblys ákiminiń jeke qabyldaýy bekitilgen kestege sáikes jalǵasyn tappaq. Mundai kezdesýler kóptegen túitkildi máselelerdiń jaýabyn alýǵa múmkindik beredi.
