«Qazaqstanda júrgizýshi kýáligin satyp alý múmkin emes», depti. Ótkende jańalyqtarǵa shyǵyp, atyshýly atanǵan erke qyzdyń «papam «prava» satyp alyp berdi», degen jazbasyna qatysty pikir bildirgen túri eken.
«Budan 4 jyl buryn bul týraly osy salada isteitinderden suram bilgem. «Pravany» amalyn taýyp satyp alýǵa bola ma?» degenimde, munyń múmkin emesin aitqan. Solai, múmkin emes», — depti senator.
Suraityn adamdy taýypty. Osy salada isteitinder Áitimovaǵa bárin aityp bersin, iá. Óz-ózine or qazatyn olar da aqymaq emes shyǵar.
Odan buryn kesip-piship aitatyndai, bul kisi qai elde ómir súredi ózi? Onyń oiyndaǵy Qazaqstan qandai? Sosyn, jetik bilmeitin másele boiynsha halyqtyń atynan sóileýdi qashan qoiady? Qazaqstandy odan qaraǵanda, myna biz (el-jurtty aitamyz) jaqsy bilemiz, negizinde. Qazaqstanda bári satylady. Biletinimiz, osy.
Byltyr ma, áiteýir, bir ýaqytta Áitimovanyń bylai degeni bar. «Qazaq jastary nesiege ómir súrip úirenýi kerek». Iaǵni, úi alsa da, ne alsa da nesiege kirýi tiis. Osy Áitimova bir kezderi Jastar isi jónindegi ministri boldy dep kim aitady?
Mundailar halyqtyń atynan sóileýdi qashan qoiady? Qoimaidy. Óitkeni, olardyń ózi ádemi álemde, onyń deńgeiindegi adamǵa «ái» dei almaityn «ádiletti Qazaqstanda» ómir súredi. Demek, tutas memleketti de óziniń ortasyna, kigen kiimine, ishken tamaǵyna qarai baǵalaidy.
Qyzyq, «Qazaqstanda júrgizýshi kýáligin satyp alý múmkin emes», deý arqyly senator ne aitqysy keldi? Qudai biledi, erik berse ,«bul elde jemqorlyq joq, korrýptsiiany túbirimen qoparyp, tamyrymen julyp tastadyq», deýi de ǵajap emes. Sózinen sony ańǵardyq.
Shyn mánindegi Qazaqstan qandai? Áitimova bilmeidi ony. Bilse de, bilgisi kelmeidi.
Oǵan bilgisi kelmeitin Qazaqstan qajet.
Áitpese, eldi álemdegi damyǵan 30 memlekettiń sapyna qosý Astananyń ádemiligimen ǵana ólshenbesin bilse, túsinse, kerek edi.
Bizde bári satylady. Bizde bári dámetedi. Onsyz is ónbeidi, jumys júrmeidi. Demokratiialyq elderdiń standarttary men tehnologiiasy Qazaqstanǵa kelgende, kibirtiktep qalatyny sodan. Shyn Qazaqstan osyndai.
Dýman Byqai
