«قازاقستاندا جۇرگىزۋشى كۋالىگىن ساتىپ الۋ مۇمكىن ەمەس»، دەپتى. وتكەندە جاڭالىقتارعا شىعىپ، اتىشۋلى اتانعان ەركە قىزدىڭ «پاپام «پراۆا» ساتىپ الىپ بەردى»، دەگەن جازباسىنا قاتىستى پىكىر بىلدىرگەن ءتۇرى ەكەن.
«بۇدان 4 جىل بۇرىن بۇل تۋرالى وسى سالادا ىستەيتىندەردەن سۇرام بىلگەم. «پراۆانى» امالىن تاۋىپ ساتىپ الۋعا بولا ما؟» دەگەنىمدە، مۇنىڭ مۇمكىن ەمەسىن ايتقان. سولاي، مۇمكىن ەمەس»، — دەپتى سەناتور.
سۇرايتىن ادامدى تاۋىپتى. وسى سالادا ىستەيتىندەر ءايتىموۆاعا ءبارىن ايتىپ بەرسىن، ءيا. وز-وزىنە ور قازاتىن ولار دا اقىماق ەمەس شىعار.
ودان بۇرىن كەسىپ-پىشىپ ايتاتىنداي، بۇل كىسى قاي ەلدە ءومىر سۇرەدى ءوزى؟ ونىڭ ويىنداعى قازاقستان قانداي؟ سوسىن، جەتىك بىلمەيتىن ماسەلە بويىنشا حالىقتىڭ اتىنان سويلەۋدى قاشان قويادى؟ قازاقستاندى ودان قاراعاندا، مىنا ءبىز (ەل-جۇرتتى ايتامىز) جاقسى بىلەمىز، نەگىزىندە. قازاقستاندا ءبارى ساتىلادى. بىلەتىنىمىز، وسى.
بىلتىر ما، ايتەۋىر، ءبىر ۋاقىتتا ءايتىموۆانىڭ بىلاي دەگەنى بار. «قازاق جاستارى نەسيەگە ءومىر ءسۇرىپ ۇيرەنۋى كەرەك». ياعني، ءۇي السا دا، نە السا دا نەسيەگە كىرۋى ءتيىس. وسى ءايتىموۆا ءبىر كەزدەرى جاستار ءىسى جونىندەگى ءمينيسترى بولدى دەپ كىم ايتادى؟
مۇندايلار حالىقتىڭ اتىنان سويلەۋدى قاشان قويادى؟ قويمايدى. ويتكەنى، ولاردىڭ ءوزى ادەمى الەمدە، ونىڭ دەڭگەيىندەگى ادامعا «ءاي» دەي المايتىن «ادىلەتتى قازاقستاندا» ءومىر سۇرەدى. دەمەك، تۇتاس مەملەكەتتى دە ءوزىنىڭ ورتاسىنا، كيگەن كيىمىنە، ىشكەن تاماعىنا قاراي باعالايدى.
قىزىق، «قازاقستاندا جۇرگىزۋشى كۋالىگىن ساتىپ الۋ مۇمكىن ەمەس»، دەۋ ارقىلى سەناتور نە ايتقىسى كەلدى؟ قۇداي بىلەدى، ەرىك بەرسە ،«بۇل ەلدە جەمقورلىق جوق، كوررۋپسيانى تۇبىرىمەن قوپارىپ، تامىرىمەن جۇلىپ تاستادىق»، دەۋى دە عاجاپ ەمەس. سوزىنەن سونى اڭعاردىق.
شىن مانىندەگى قازاقستان قانداي؟ ءايتىموۆا بىلمەيدى ونى. بىلسە دە، بىلگىسى كەلمەيدى.
وعان بىلگىسى كەلمەيتىن قازاقستان قاجەت.
ايتپەسە، ەلدى الەمدەگى دامىعان 30 مەملەكەتتىڭ ساپىنا قوسۋ استانانىڭ ادەمىلىگىمەن عانا ولشەنبەسىن بىلسە، تۇسىنسە، كەرەك ەدى.
بىزدە ءبارى ساتىلادى. بىزدە ءبارى دامەتەدى. ونسىز ءىس ونبەيدى، جۇمىس جۇرمەيدى. دەموكراتيالىق ەلدەردىڭ ستاندارتتارى مەن تەحنولوگياسى قازاقستانعا كەلگەندە، كىبىرتىكتەپ قالاتىنى سودان. شىن قازاقستان وسىنداي.
دۋمان بىقاي
