Májilis depýtaty Ashat Aimaǵambetov Talǵardaǵy tragediiaǵa qatysty oiyn aitty, dep habarlaidy Dalanews.kz.
Depýtat bul oqiǵa tek quqyq qorǵaý organdaryna ǵana emes, búkil qoǵamǵa syn ekenin aitady.
"Talǵarda bolǵan qaiǵyly oqiǵa jaǵa ustatty. Jas jigitti óltirip, otbasynyń úiin órtep jibergen jaýyzdyq, haiýandyq jáne ádiletsiz qylmys bárimizdiń qabyrǵamyzdy qaiystyrdy. Bul oqiǵa tek quqyq qorǵaý organdaryna ǵana emes, búkil qoǵamǵa syn. Sherzat Bolattyń otbasyna qaiǵyryp kóńil aitamyn.
Bul isti tergeýde barynsha ashyqtyq pen ádildik qajet. Kinálilerdiń barlyǵy zań aldynda jaýapqa tartylyp, óz jazasyn alýy tiis. Politsiia men prokýratýra eshkimniń jazadan qutylyp ketpeýin qamtamasyz etýi kerek. Bul qylmys quqyq qorǵaý organdarynda júieli reformalardy iske asyrýǵa sebep bolýy qajet. Bul zańnyń talaby ǵana emes, qoǵam aldyndaǵy paryzymyz" deidi depýtat.
Aimaǵambetov kinálilerge qarsy zorlyq-zombylyq tanytý arqyly máseleni sheshilmeitinin atap ótti.
"Qaqtyǵysty ýshyqtyrmai, óz narazylyǵymyz ben pozitsiiamyzdy bildirý kezinde zańdy buzbai, ońtaily joldy qoldanǵan jón. Barlyq máseleni zań aiasynda sheshýge bolady jáne bizdiń qoǵamda kez kelgen másele solai sheshilýi qajet. Bul qaiǵyly oqiǵany qasaqana túrde jaǵdaidy turaqsyzdandyrý úshin paidalanýy múmkin ekenin joqqa shyǵarmaimyn.
Sondyqtan qazir arandatýǵa boi aldyrmaý, ádil jazany qamtamasyz etý jáne quqyq qorǵaý júiesinde tereń, júieli reformalar jasaý úshin kúsh-jigerimizdi biriktirý asa mańyzdy. “Zań jáne tártip” printsipi barshaǵa birdei jumys isteýi kerek. Bizdiń elde zańnyń ústemdigi tujyrymdamasy jumys isteidi, demek eshkimniń zańnan joǵary bola almaitynyn, zań aldynda bári teń ekenin túsinýimiz kerek. Bul is Bas prokýrordyń baqylaýyna alynǵan, al otbasy politsiia qorǵaýynda. Qazirgi ýaqytta qylmyskerlerdi jazalap, quqyqtyq júieniń barlyq qaharly kúshin kórsetý mańyzdy. Eldi dúrliktirýge baǵyttalǵan tekserilmegen aqparattardy taratpaiyq" deidi depýtat.
Aita keteiik, 12 qazanǵa qaraǵan túni Talǵar tragediiasynda qaza tapqan Sherzat Bolattyń úii órtenip ketti. Bul týraly áleýmettik jelide habarlana bastady.
Bul derekke Politsiia departamenti jaýap berdi. 12 qazanǵa qaraǵan túni Eńbekshiqazaq aýdany Azat aýylyndaǵy úilerdiń birinde órt boldy.
Politsiia bótenniń múlkin qasaqana joiý deregi boiynsha qylmystyq is qozǵady.
Tergeý aiasynda kýágerlerden jaýap alynyp jatyr, sondai-aq beinebaqylaý kameralarynyń jazbalary zerttelip jatyr.
Artynsha Sherzat Bolattyń otbasyn politsiia kúzetetini belgili boldy.
Búgin, 12 qazanda Bas prokýratýranyń basshylyǵymen qylmysty ashý úshin vedomstvoaralyq jedel-tergeý toby quryldy.
Kinálilerdi áshkereleý úshin barlyq sharalar qabyldanatyn bolady. Qylmystyq is Qazaqstan Respýblikasy Bas Prokýrorynyń baqylaýyna alyndy.
