ءماجىلىس دەپۋتاتى اسحات ايماعامبەتوۆ تالعارداعى تراگەدياعا قاتىستى ويىن ايتتى، دەپ حابارلايدى Dalanews.kz.
دەپۋتات بۇل وقيعا تەك قۇقىق قورعاۋ ورگاندارىنا عانا ەمەس، بۇكىل قوعامعا سىن ەكەنىن ايتادى.
"تالعاردا بولعان قايعىلى وقيعا جاعا ۇستاتتى. جاس جىگىتتى ءولتىرىپ، وتباسىنىڭ ءۇيىن ورتەپ جىبەرگەن جاۋىزدىق، حايۋاندىق جانە ادىلەتسىز قىلمىس ءبارىمىزدىڭ قابىرعامىزدى قايىستىردى. بۇل وقيعا تەك قۇقىق قورعاۋ ورگاندارىنا عانا ەمەس، بۇكىل قوعامعا سىن. شەرزات بولاتتىڭ وتباسىنا قايعىرىپ كوڭىل ايتامىن.
بۇل ءىستى تەرگەۋدە بارىنشا اشىقتىق پەن ادىلدىك قاجەت. كىنالىلەردىڭ بارلىعى زاڭ الدىندا جاۋاپقا تارتىلىپ، ءوز جازاسىن الۋى ءتيىس. پوليسيا مەن پروكۋراتۋرا ەشكىمنىڭ جازادان قۇتىلىپ كەتپەۋىن قامتاماسىز ەتۋى كەرەك. بۇل قىلمىس قۇقىق قورعاۋ ورگاندارىندا جۇيەلى رەفورمالاردى ىسكە اسىرۋعا سەبەپ بولۋى قاجەت. بۇل زاڭنىڭ تالابى عانا ەمەس، قوعام الدىنداعى پارىزىمىز" دەيدى دەپۋتات.
ايماعامبەتوۆ كىنالىلەرگە قارسى زورلىق-زومبىلىق تانىتۋ ارقىلى ماسەلەنى شەشىلمەيتىنىن اتاپ ءوتتى.
"قاقتىعىستى ۋشىقتىرماي، ءوز نارازىلىعىمىز بەن پوزيسيامىزدى ءبىلدىرۋ كەزىندە زاڭدى بۇزباي، وڭتايلى جولدى قولدانعان ءجون. بارلىق ماسەلەنى زاڭ اياسىندا شەشۋگە بولادى جانە ءبىزدىڭ قوعامدا كەز كەلگەن ماسەلە سولاي شەشىلۋى قاجەت. بۇل قايعىلى وقيعانى قاساقانا تۇردە جاعدايدى تۇراقسىزداندىرۋ ءۇشىن پايدالانۋى مۇمكىن ەكەنىن جوققا شىعارمايمىن.
سوندىقتان ءقازىر ارانداتۋعا بوي الدىرماۋ، ءادىل جازانى قامتاماسىز ەتۋ جانە قۇقىق قورعاۋ جۇيەسىندە تەرەڭ، جۇيەلى رەفورمالار جاساۋ ءۇشىن كۇش-جىگەرىمىزدى بىرىكتىرۋ اسا ماڭىزدى. “زاڭ جانە ءتارتىپ” ءپرينسيپى بارشاعا بىردەي جۇمىس ىستەۋى كەرەك. ءبىزدىڭ ەلدە زاڭنىڭ ۇستەمدىگى تۇجىرىمداماسى جۇمىس ىستەيدى، دەمەك ەشكىمنىڭ زاڭنان جوعارى بولا المايتىنىن، زاڭ الدىندا ءبارى تەڭ ەكەنىن ءتۇسىنۋىمىز كەرەك. بۇل ءىس باس پروكۋروردىڭ باقىلاۋىنا الىنعان، ال وتباسى پوليسيا قورعاۋىندا. قازىرگى ۋاقىتتا قىلمىسكەرلەردى جازالاپ، قۇقىقتىق جۇيەنىڭ بارلىق قاحارلى كۇشىن كورسەتۋ ماڭىزدى. ەلدى دۇرلىكتىرۋگە باعىتتالعان تەكسەرىلمەگەن اقپاراتتاردى تاراتپايىق" دەيدى دەپۋتات.
ايتا كەتەيىك، 12 قازانعا قاراعان ءتۇنى تالعار تراگەدياسىندا قازا تاپقان شەرزات بولاتتىڭ ءۇيى ورتەنىپ كەتتى. بۇل تۋرالى الەۋمەتتىك جەلىدە حابارلانا باستادى.
بۇل دەرەككە پوليسيا دەپارتامەنتى جاۋاپ بەردى. 12 قازانعا قاراعان ءتۇنى ەڭبەكشىقازاق اۋدانى ازات اۋىلىنداعى ۇيلەردىڭ بىرىندە ءورت بولدى.
پوليسيا بوتەننىڭ مۇلكىن قاساقانا جويۋ دەرەگى بويىنشا قىلمىستىق ءىس قوزعادى.
تەرگەۋ اياسىندا كۋاگەرلەردەن جاۋاپ الىنىپ جاتىر، سونداي-اق بەينەباقىلاۋ كامەرالارىنىڭ جازبالارى زەرتتەلىپ جاتىر.
ارتىنشا شەرزات بولاتتىڭ وتباسىن پوليسيا كۇزەتەتىنى بەلگىلى بولدى.
بۇگىن، 12 قازاندا باس پروكۋراتۋرانىڭ باسشىلىعىمەن قىلمىستى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلدى.
كىنالىلەردى اشكەرەلەۋ ءۇشىن بارلىق شارالار قابىلداناتىن بولادى. قىلمىستىق iس قازاقستان رەسپۋبليكاسى باس پروكۋرورىنىڭ باقىلاۋىنا الىندى.
