Májilis depýtaty Maqsat Tolyqbai ishki ister ministri Erjan Sadenovke depýtattyq saýal joldap, el ishindegi atyshýly qylmystarǵa nazar aýdardy,- dep habarlaidy Dalanews.kz.
Depýtattyń sózinshe, búginde "bizdiń qoǵam qaýipsiz be, joq pa?" degen suraq árbir adamdy mazalaidy.
"Byltyr bilesizder, áriptesterimiz Májilis minberinen qaskóilerdiń qolynan qaza tapqan Sherzat Polat týraly aitqan bolatyn. 16 jasar balany aiaýsyz óltirgender qatań jazaǵa tartylýy keregin talap ettik. Aǵaiynnyń keýdesin ashý kernep otyrǵanda Sherzattyń ólimine kúdikti retinde qamalǵandardyń ýaqytsha ustaý izoliatorynda án tyńdap, tátti jep, uialy telefon paidalanyp, ýaiymsyz oinap-kúlgenin kórdik. Jurt jaǵasyn ustady, artynsha qyzmetkerler jazalandy. Biraq bul "aqshasy bardyń abaqtydada murtyn balta shappaidy degen ras eken-aý" degen oiǵa qaldyrdy", - dedi ol.
Depýtat sot otyrysyna qatysty da pikir bildirdi.
"Jýyrda bul is boiynsha sot bastaldy. Aiyptaý aktisin oqyǵan prokýror eldiń esin ekeý, túsin tórteý qyldy. Qaskóiler anasy men ájesiniń kózinshe Sherzattyń júrek tusyna pyshaq suǵyp, artynsha basynan myltyqtyń dúmimen urǵan. Bul sumdyqty kózimen kórip balasyna kómektespek bolǵan anany taǵy eki qaskói jibermei ustap turǵan. Bul sumdyq emes pe? Qaýipsiz qoǵamdy qaýip-qaterdiń ortasyna ainaldyrǵandar ýaqytynda nege jazasyn almaǵan? Suraq kóp", - dedi depýtat.
Maqsat Tolyqbaidyń sózinshe, Sherzattyń qazasyna qatysty sot onlain ótsin degen talaptary oryndalǵan.
"Endi sheshimniń ádil bolýyn jaýapty organdar qamtamassyz etýi shart", - dedi ol.
Depýtat jýyrda Jambyl oblysynda mototsikl júrgizýshisine jasalǵan shabýyl tóńireginde de pikir bildirdi.
"Jaqynda Merkide bolǵan jaǵdai da qoǵamdy qatty úreilendirdi. Shymkenttegi motomaýsymnyń ashylýynan qaityp bara jatqan mototsiklshige bir qaskói janarmai beketinde eki ret pyshaq suqqan. Bári beinejazbada bar. Artynsha baikerdiń shetel azamaty ekeni belgili boldy. Qazaq «úiińe kelgenge, úidei ókpendi aitpa» deýshi edi. Al álgindei áreketter Qazaqstannyń imidjine esepsiz nuqsan keltirdi. Jyldar boiy týrist shaqyramyz dep etken eńbek esh ketti dei berińiz. Tal túste beinekameralardy kóre tura adamdy pyshaqtap ketý qoǵamdaǵy qaýipsizdikke qatysty úlken suraq týdyrady", - dedi Tolyqbai.
Depýtat qazir mundai dúnieni prank dep dáripteitinder kóbeigenin de alǵa tartty.
"Jelidegi jurt "ainaladaǵy adamdar nege dereý arasha túspedi" degen saýal qoiypty. Munyń jaýaby alýan, biraq bir másele bar. Ol qazir prank atalyp ketken qubylys. Internetti ashyp qalsań, paraqshany basyp qalsań aldymen pyshaqtasyp, artynsha qushaqtasyp júrgenderdi kóresiń. Jurttyń kózinshe janjaldasyp, tóbeles shyǵaryp, dereý qaltalarynan pyshaq alyp shyǵyp ony bir-birine suǵyp qulap eldiń esin alatyndar bar. Sanaýly minýttan soń «bul prank» dep túk bolmaǵandai qarq-qarq kúledi.
Siqyry joq, qoldaryndaǵy qarý kedergige tap bolǵanda júzi ishine kirip ketetin pyshaqtar. Bul ne masqara? Endi beitanys bireý pyshaq ala júgirse "bul shyn ba? Álde prank pa? Qolyndaǵy pyshaq shynymen jaralai ma, álde júzi ishine kirip kete me?" dep kútip turý kerek pe?" - dep ashyndy ol.
Maqsat Tolyqbai ishki ister organdarynan mundai jaǵdaida qatań shara qoldanýdy talap etti.
"Oiynnan ot shyǵady degendi bala kezden bilip óstik. Sol otty úrlep júrgenderdi quqyq qorǵaý oryndary jaýapqa tartý kerek. Álgindei oiyny qanbaǵan oisyzdardyń oiynshyǵyn satylymnan alyp tastaý qajet! Bul qoǵamnyń qaýipsizdigi úshin kerek. Jaýapty organdar aiyptynyń zańǵa sáikes jazasyn alýyn qadaǵalaýy qajet", - dedi ol.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
