ءماجىلىس دەپۋتاتى ماقسات تولىقباي ىشكى ىستەر ءمينيسترى ەرجان سادەنوۆكە دەپۋتاتتىق ساۋال جولداپ، ەل ىشىندەگى اتىشۋلى قىلمىستارعا نازار اۋداردى،- دەپ حابارلايدى Dalanews.kz.
دەپۋتاتتىڭ سوزىنشە، بۇگىندە "ءبىزدىڭ قوعام ءقاۋىپسىز بە، جوق پا؟" دەگەن سۇراق ءاربىر ادامدى مازالايدى.
"بىلتىر بىلەسىزدەر، ارىپتەستەرىمىز ءماجىلىس مىنبەرىنەن قاسكويلەردىڭ قولىنان قازا تاپقان شەرزات پولات تۋرالى ايتقان بولاتىن. 16 جاسار بالانى اياۋسىز ولتىرگەندەر قاتاڭ جازاعا تارتىلۋى كەرەگىن تالاپ ەتتىك. اعايىننىڭ كەۋدەسىن اشۋ كەرنەپ وتىرعاندا شەرزاتتىڭ ولىمىنە كۇدىكتى رەتىندە قامالعانداردىڭ ۋاقىتشا ۇستاۋ يزولياتورىندا ءان تىڭداپ، ءتاتتى جەپ، ۇيالى تەلەفون پايدالانىپ، ۋايىمسىز ويناپ-كۇلگەنىن كوردىك. جۇرت جاعاسىن ۇستادى، ارتىنشا قىزمەتكەرلەر جازالاندى. ءبىراق بۇل "اقشاسى باردىڭ اباقتىدادا مۇرتىن بالتا شاپپايدى دەگەن راس ەكەن-اۋ" دەگەن ويعا قالدىردى"، - دەدى ول.
دەپۋتات سوت وتىرىسىنا قاتىستى دا پىكىر ءبىلدىردى.
"جۋىردا بۇل ءىس بويىنشا سوت باستالدى. ايىپتاۋ اكتىسىن وقىعان پروكۋرور ەلدىڭ ەسىن ەكەۋ، ءتۇسىن تورتەۋ قىلدى. قاسكويلەر اناسى مەن اجەسىنىڭ كوزىنشە شەرزاتتىڭ جۇرەك تۇسىنا پىشاق سۇعىپ، ارتىنشا باسىنان مىلتىقتىڭ دۇمىمەن ۇرعان. بۇل سۇمدىقتى كوزىمەن كورىپ بالاسىنا كومەكتەسپەك بولعان انانى تاعى ەكى قاسكوي جىبەرمەي ۇستاپ تۇرعان. بۇل سۇمدىق ەمەس پە؟ ءقاۋىپسىز قوعامدى قاۋىپ-قاتەردىڭ ورتاسىنا اينالدىرعاندار ۋاقىتىندا نەگە جازاسىن الماعان؟ سۇراق كوپ"، - دەدى دەپۋتات.
ماقسات تولىقبايدىڭ سوزىنشە، شەرزاتتىڭ قازاسىنا قاتىستى سوت ونلاين ءوتسىن دەگەن تالاپتارى ورىندالعان.
"ەندى شەشىمنىڭ ءادىل بولۋىن جاۋاپتى ورگاندار قامتاماسسىز ەتۋى شارت"، - دەدى ول.
دەپۋتات جۋىردا جامبىل وبلىسىندا موتوسيكل جۇرگىزۋشىسىنە جاسالعان شابۋىل توڭىرەگىندە دە پىكىر ءبىلدىردى.
"جاقىندا مەركىدە بولعان جاعداي دا قوعامدى قاتتى ۇرەيلەندىردى. شىمكەنتتەگى موتوماۋسىمنىڭ اشىلۋىنان قايتىپ بارا جاتقان موتوسيكلشىگە ءبىر قاسكوي جانارماي بەكەتىندە ەكى رەت پىشاق سۇققان. ءبارى بەينەجازبادا بار. ارتىنشا بايكەردىڭ شەتەل ازاماتى ەكەنى بەلگىلى بولدى. قازاق «ۇيىڭە كەلگەنگە، ۇيدەي وكپەندى ايتپا» دەۋشى ەدى. ال الگىندەي ارەكەتتەر قازاقستاننىڭ يميدجىنە ەسەپسىز نۇقسان كەلتىردى. جىلدار بويى تۋريست شاقىرامىز دەپ ەتكەن ەڭبەك ەش كەتتى دەي بەرىڭىز. تال تۇستە بەينەكامەرالاردى كورە تۇرا ادامدى پىشاقتاپ كەتۋ قوعامداعى قاۋىپسىزدىككە قاتىستى ۇلكەن سۇراق تۋدىرادى"، - دەدى تولىقباي.
دەپۋتات ءقازىر مۇنداي دۇنيەنى پرانك دەپ دارىپتەيتىندەر كوبەيگەنىن دە العا تارتتى.
"جەلىدەگى جۇرت "اينالاداعى ادامدار نەگە دەرەۋ اراشا تۇسپەدى" دەگەن ساۋال قويىپتى. مۇنىڭ جاۋابى الۋان، ءبىراق ءبىر ماسەلە بار. ول ءقازىر پرانك اتالىپ كەتكەن قۇبىلىس. ينتەرنەتتى اشىپ قالساڭ، پاراقشانى باسىپ قالساڭ الدىمەن پىشاقتاسىپ، ارتىنشا قۇشاقتاسىپ جۇرگەندەردى كورەسىڭ. جۇرتتىڭ كوزىنشە جانجالداسىپ، توبەلەس شىعارىپ، دەرەۋ قالتالارىنان پىشاق الىپ شىعىپ ونى بىر-بىرىنە سۇعىپ قۇلاپ ەلدىڭ ەسىن الاتىندار بار. ساناۋلى مينۋتتان سوڭ «بۇل پرانك» دەپ تۇك بولماعانداي قارق-قارق كۇلەدى.
سيقىرى جوق، قولدارىنداعى قارۋ كەدەرگىگە تاپ بولعاندا ءجۇزى ىشىنە كىرىپ كەتەتىن پىشاقتار. بۇل نە ماسقارا؟ ەندى بەيتانىس بىرەۋ پىشاق الا جۇگىرسە "بۇل شىن با؟ الدە پرانك پا؟ قولىنداعى پىشاق شىنىمەن جارالاي ما، الدە ءجۇزى ىشىنە كىرىپ كەتە مە؟" دەپ كۇتىپ تۇرۋ كەرەك پە؟" - دەپ اشىندى ول.
ماقسات تولىقباي ىشكى ىستەر ورگاندارىنان مۇنداي جاعدايدا قاتاڭ شارا قولدانۋدى تالاپ ەتتى.
"ويىننان وت شىعادى دەگەندى بالا كەزدەن ءبىلىپ وستىك. سول وتتى ۇرلەپ جۇرگەندەردى قۇقىق قورعاۋ ورىندارى جاۋاپقا تارتۋ كەرەك. الگىندەي ويىنى قانباعان ويسىزداردىڭ ويىنشىعىن ساتىلىمنان الىپ تاستاۋ قاجەت! بۇل قوعامنىڭ قاۋىپسىزدىگى ءۇشىن كەرەك. جاۋاپتى ورگاندار ايىپتىنىڭ زاڭعا سايكەس جازاسىن الۋىن قاداعالاۋى قاجەت"، - دەدى ول.
شەرزات بولاتتىڭ ءولىمى تۋرالى نە بەلگىلى؟
ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.
كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.
كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى.
ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعانان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.
