Astanada egizge júkti bolǵan áieldiń eki balasynan aiyrylýyna bailanysty qyzmettik tergeý júrgizilip jatyr. Qalalyq qoǵamdyq densaýlyq saqtaý basqarmasy jaǵdaidy baqylaýda ustap otyrǵanyn málimdedi, dep habarlaidy dalanews.kz.
Astana qalasynyń qoǵamdyq densaýlyq saqtaý basqarmasynyń málimetinshe, qazir áiel bosanǵannan keiingi bólimde jatyr. Ol qajetti em alyp, dárigerlerdiń baqylaýynda.
«Astana qalasynyń qoǵamdyq densaýlyq saqtaý basqarmasy atalǵan jaǵdai boiynsha aqparat beredi. Jaǵdai basqarmanyń baqylaýynda. Qazirgi ýaqytta patsient bosanǵannan keiingi bólimde jatyr, qajetti em qabyldap, meditsinalyq baqylaýda. Atalǵan jaǵdai boiynsha qyzmettik tergeý júrgizilýde. Tergeý qorytyndysy boiynsha tiisti baǵa beriledi», – dep habarlady basqarma.
Buǵan deiin birqatar BAQ-ta áieldiń týystaryna silteme jasap, júktiliktiń altynshy aiynda uryqtardyń biriniń shetinep ketkeni týraly aqparat taraǵan. Týystarynyń aitýynsha, sol kezde dárigerler otbasyna júktilikti jalǵastyrýǵa múmkindik bar ekenin aitqan.
Olardyń málimetinshe, birneshe aptadan keiin áieldiń densaýlyǵy nasharlap, taldaý kórsetkishteri ózgergen. Keiin ol perinataldyq ortalyqqa jatqyzylǵan.
Týystarynyń sózinshe, shuǵyl operatsiia áiel meditsinalyq mekemege túskennen birneshe kún ótken soń jasalǵan.
Ekinshi sábi júktiliktiń 31-aptasynda dúniege kelip, shamamen bir táýlik ómir súrgen. Týystary balanyń ólimin sepsispen bailanystyrady. Alaida jariialanǵan aqparatta bul sebepti rastaityn resmi meditsinalyq qorytyndy keltirilmegen.
Qazir áiel bosanǵannan keiingi bólimde em qabyldap jatyr. Qyzmettik tergeý nátijesi boiynsha jaǵdaiǵa tiisti baǵa beriletini habarlandy.
