استانادا ەگٸزگە جٷكتٸ بولعان ەيەلدٸڭ ەكٸ بالاسىنان ايىرىلۋىنا بايلانىستى قىزمەتتٸك تەرگەۋ جٷرگٸزٸلٸپ جاتىر. قالالىق قوعامدىق دەنساۋلىق ساقتاۋ باسقارماسى جاعدايدى باقىلاۋدا ۇستاپ وتىرعانىن مەلٸمدەدٸ, دەپ حابارلايدى dalanews.kz.
استانا قالاسىنىڭ قوعامدىق دەنساۋلىق ساقتاۋ باسقارماسىنىڭ مەلٸمەتٸنشە, قازٸر ەيەل بوسانعاننان كەيٸنگٸ بٶلٸمدە جاتىر. ول قاجەتتٸ ەم الىپ, دەرٸگەرلەردٸڭ باقىلاۋىندا.
«استانا قالاسىنىڭ قوعامدىق دەنساۋلىق ساقتاۋ باسقارماسى اتالعان جاعداي بويىنشا اقپارات بەرەدٸ. جاعداي باسقارمانىڭ باقىلاۋىندا. قازٸرگٸ ۋاقىتتا پاتسيەنت بوسانعاننان كەيٸنگٸ بٶلٸمدە جاتىر, قاجەتتٸ ەم قابىلداپ, مەديتسينالىق باقىلاۋدا. اتالعان جاعداي بويىنشا قىزمەتتٸك تەرگەۋ جٷرگٸزٸلۋدە. تەرگەۋ قورىتىندىسى بويىنشا تيٸستٸ باعا بەرٸلەدٸ», – دەپ حابارلادى باسقارما.
بۇعان دەيٸن بٸرقاتار باق-تا ەيەلدٸڭ تۋىستارىنا سٸلتەمە جاساپ, جٷكتٸلٸكتٸڭ التىنشى ايىندا ۇرىقتاردىڭ بٸرٸنٸڭ شەتٸنەپ كەتكەنٸ تۋرالى اقپارات تاراعان. تۋىستارىنىڭ ايتۋىنشا, سول كەزدە دەرٸگەرلەر وتباسىنا جٷكتٸلٸكتٸ جالعاستىرۋعا مٷمكٸندٸك بار ەكەنٸن ايتقان.
ولاردىڭ مەلٸمەتٸنشە, بٸرنەشە اپتادان كەيٸن ەيەلدٸڭ دەنساۋلىعى ناشارلاپ, تالداۋ كٶرسەتكٸشتەرٸ ٶزگەرگەن. كەيٸن ول پەريناتالدىق ورتالىققا جاتقىزىلعان.
تۋىستارىنىڭ سٶزٸنشە, شۇعىل وپەراتسييا ەيەل مەديتسينالىق مەكەمەگە تٷسكەننەن بٸرنەشە كٷن ٶتكەن سوڭ جاسالعان.
ەكٸنشٸ سەبي جٷكتٸلٸكتٸڭ 31-اپتاسىندا دٷنيەگە كەلٸپ, شامامەن بٸر تەۋلٸك ٶمٸر سٷرگەن. تۋىستارى بالانىڭ ٶلٸمٸن سەپسيسپەن بايلانىستىرادى. الايدا جارييالانعان اقپاراتتا بۇل سەبەپتٸ راستايتىن رەسمي مەديتسينالىق قورىتىندى كەلتٸرٸلمەگەن.
قازٸر ەيەل بوسانعاننان كەيٸنگٸ بٶلٸمدە ەم قابىلداپ جاتىر. قىزمەتتٸك تەرگەۋ نەتيجەسٸ بويىنشا جاعدايعا تيٸستٸ باعا بەرٸلەتٸنٸ حابارلاندى.
