وسى اپتادا كەي اكتسييالار قۇنىنىڭ قۇلاۋى مەن اقش سۋۆەرەندى وبليگاتسييالارى (US Treasuries) كٸرٸستٸلٸگٸنٸڭ ٶسۋٸنەن تۋىنداعان اكتسييالار نارىعىنداعى پەسسەميزمنٸڭ قازاقستان قورلارىنا ەسەرٸنە باعا بەرٸلمەك. قۇلاۋدىڭ باستى درايۆەرى Nvidia بولدى.
"قازٸر ۇلتتىق قور مەن بٸرٸڭعاي جيناقتاۋشى زەينەتاقى قورىنىڭ شەتەلدٸك اكتسييالاردا ۇستاپ وتىرعان اقشاسى شامامەن 13,9 ترلن تەڭگە نەمەسە 31 ملرد دوللار. بۇل از سوما ەمەس. سوندىقتان Nvidia مەن US Treasuries بويىنشا جاعداي الاڭداۋعا تۇرارلىق", - دەيدٸ, DALA INSIDE دەرەككٶزٸ.
Nvidia اكتسييالارى شامامەن 10 پايىزعا ارزاندادى. ۇلتتىق قور مەن بجزق-نىڭ شەتەلدٸك اكتسييالار پورتفەلٸندەگٸ Nvidia ٷلەسٸ 1% بولعان ستسەنارييدە, وسى قۇلدىراۋ پورتفەلدٸڭ نارىقتىق قۇنىن شامامەن 13,94 ملرد تەڭگەگە تٶمەندەتەدٸ. بۇل جالپى 30,97 ملرد دوللار پورتفەلدٸڭ 0,1%-ىنا تەڭ.
قازاقستاننىڭ ينۆەستيتسييالىق پورتفەلدەرٸنە قىسىم تەك Nvidia ارقىلى كەلمەيدٸ. اقش قازىناشىلىق وبليگاتسييالارىنىڭ (US Treasuries) كٸرٸستٸلٸگٸ ٶسكەندە, ەلەمدٸك اكتسييالار نارىعىنا دا سالماق تٷسەدٸ. مەحانيزمٸ قاراپايىم. اقش مەملەكەتتٸك وبليگاتسييالارى جوعارىراق كٸرٸس ۇسىنسا, ينۆەستورلار اكتسييادان دا كٶبٸرەك تابىس تالاپ ەتەدٸ. وسى ىقپال Nvidia-مەن شەكتەلمەي, حالىقارالىق يندەكستەرگە كٸرەتٸن باسقا كومپانييالارعا تاراسا, قازاقستاننىڭ شەتەلدٸك اكتسييالار پورتفەلٸنە ەسەرٸ ەلدەقايدا اۋقىمدى بولۋى مٷمكٸن.
بۇعان دەيٸن ەسەپتەگەن 30,97 ميلليارد دوللارلىق پورتفەلدٸ نەگٸزگە العاندا, اكتسييالاردىڭ جالپى نارىقتىق قۇنى 1 پايىز تٶمەندەسە, ازايۋ 309,7 ميلليون دوللاردى, شارتتى 450 تەڭگەلٸك باعاممەن 139,36 ميلليارد تەڭگەنٸ قۇرايدى.
بۇل پورتفەلدٸڭ نارىق قوزعالىسىنا سەزٸمتالدىعىن كٶرسەتەتٸن ستسەناريي. Treasuries كٸرٸستٸلٸگٸ 1 پايىزدىق تارماققا كٶتەرٸلسە, اكتسييالار دەل 1 پايىز تٷسەدٸ دەگەن بايلانىس جوق. يندەكستٸڭ قوزعالىسى مەن ناقتى پورتفەلدٸڭ نەتيجەسٸ دە بٸردەي بولماۋى مٷمكٸن.
سوندىقتان قازاقستان Nvidia-داعى جەكە پوزيتسييامەن بٸرگە بٷكٸل اكتسييالار پورتفەلٸنٸڭ قوزعالىسىن جٸتٸ باعالاپ وتىر.