Elbasynyń baspasóz hatshysy Aidos Úkibai Nursultan Nazarbaevtyń densaýlyǵy nashar degen qaýesetti joqqa shyǵardy, dep habarlaidy Dalanews.kz.
"Keshe Qaýipsizdik Keńesiniń Tóraǵasy Nursultan Nazarbaev aimaq basshylarymen birneshe ret telefon arqyly bailanysqa shyqty, aldymen tótenshe jaǵdai kezindegi qoǵamdyq qaýipsizdikti qamtamasyz etýdiń ózekti máseleleri talqylandy.
Qatań karantin jaǵdaiynda Elbasynyń jumys keńsesine kirý shekteýli ekenin túsiný kerek. Biraq, osyndai shekteýlerge qaramastan baspasóz qyzmeti halyqty Tuńǵysh Prezidenttiń qyzmeti týraly ýaqtyly habardar etip otyrýǵa tyrysady.
Biz eshqashan óseń-aiańǵa qatysty túsinik bergen joqpyz. Alaida sońǵy ýaqytta belgili bir jeke tulǵalar eldegi jaǵdaidy turaqsyzdandyrýǵa belsendi túrde tyrysýda, sonyń ishinde Elbasynyń densaýlyǵy týraly jańsaq málimetter taratý arqyly da. Munyń bári - arandatý jáne taza ótirik.
Búginderi Nursultan Nazarbaevtyń densaýlyǵy myqty, Otanymyzdyń igiligi úshin, tipti karantin jaǵdaiynda da jumys isteýin jalǵastyrýda ekenin aita otyryp, men sizderdi osyǵan sendirgim keledi.
Eger kim de kimde buǵan kúmándansa, onda keshe Elbasymen sóilesken ákimderdiń birinen bul týraly surap bilsin.
Barlyq shekteýler alynyp tastalǵannan keiin Tuńǵysh Prezidenttiń qatysýymen ótetin jumys kezdesýlerinen nemese jiynnan jekelei video túsirýge ýáde beremin. Sóz sońynda, basqanyń sózin estýge kelgende sańyraý, basqanyń qasiretin kórýge kelgende meńireý bola qalatyn adamdardyń tili sýmań, nieti jaman bolady dep aitqym keledi", - dedi Aidos Úkibai.
