Qazaqstannyń Bas prokýratýrasy oppozitsiialyq jýrnalist Aidos Sadyqovty óltirdi degen kúdikke ilingen Altai Jaqanbaev pen Meiram Qarataevqa qatysty tergeý amaldaryn júrgizýden bas tartty, dep habarlaidy Dalanews.kz.
Bul týraly marqumnyń jary Natalia Sadyqova málimdedi. Onyń aitýynsha, Ýkraina Bas prokýratýrasyna jiberilgen resmi jaýapta tergeý júrgizýge “dálelderdiń jetkiliksizdigi” sebep retinde kórsetilgen (jýrnalist Kievte qaza tapqan — red.).
Natalia Sadyqovanyń sózinshe, ýkrain tarapy kúdiktilerdiń qylmysqa qatysy baryna dálel bolatyn mańyzdy aiǵaqtardy jinap, Qazaqstanǵa joldaǵan. Alaida soǵan qaramastan, Jaqanbaev tek qolhatpen bosatylǵan, al Qarataev múlde izdeýge de jariialanbaǵan. Bul jaǵdailardy Natalia Sadyqova qylmysty jasyrýǵa baǵyttalǵan áreket retinde baǵalap otyr.
Eske salaiyq, 2024 jyldyń 18 maýsymynda Kievte oppozitsiialyq jýrnalist, “Báse” arnasynyń avtory Aidos Sadyqovqa qastandyq jasaldy. Ol basynan oq jaraqatyn alyp, 13 kún boiy jansaqtaý bóliminde jatty. 2 shilde kúni túndeqaitys boldy.
Ýkraina Bas prokýrory keńsesi bul qylmysqa Qazaqstannyń eki azamatynyń qatysy bar ekenin jetkizgen edi.
Olar Aidos Sadyqovqa jasalǵan qastandyqqa bailanysty kúdiktilerge taǵylǵan aiypty "adam óltirýge oqtalý" babynan "tapsyrys boiynsha jáne top bolyp adamdy qasana óltirý" babyna aýystyrdy.
Ýkraina Qylmystyq kodeksindegi "Tapsyrys boiynsha jáne top bolyp adamdy qasana óltirý" babynda 15 jyldan ómir boiyna túrme jazasyna kesý aiyby qarastyrylǵan.
