قازاقستاننىڭ باس پروكۋراتۋراسى وپپوزيسيالىق جۋرناليست ايدوس سادىقوۆتى ءولتىردى دەگەن كۇدىككە ىلىنگەن التاي جاقانبايەۆ پەن مەيرام قاراتايەۆقا قاتىستى تەرگەۋ امالدارىن جۇرگىزۋدەن باس تارتتى، دەپ حابارلايدى Dalanews.kz.
بۇل تۋرالى مارقۇمنىڭ جارى ناتاليا سادىقوۆا مالىمدەدى. ونىڭ ايتۋىنشا، ۋكراينا باس پروكۋراتۋراسىنا جىبەرىلگەن رەسمي جاۋاپتا تەرگەۋ جۇرگىزۋگە “دالەلدەردىڭ جەتكىلىكسىزدىگى” سەبەپ رەتىندە كورسەتىلگەن (جۋرناليست كييەۆتە قازا تاپقان — رەد.).
ناتاليا سادىقوۆانىڭ سوزىنشە، ۋكراين تاراپى كۇدىكتىلەردىڭ قىلمىسقا قاتىسى بارىنا دالەل بولاتىن ماڭىزدى ايعاقتاردى جيناپ، قازاقستانعا جولداعان. الايدا سوعان قاراماستان، جاقانبايەۆ تەك قولحاتپەن بوساتىلعان، ال قاراتايەۆ مۇلدە ىزدەۋگە دە جاريالانباعان. بۇل جاعدايلاردى ناتاليا سادىقوۆا قىلمىستى جاسىرۋعا باعىتتالعان ارەكەت رەتىندە باعالاپ وتىر.
ەسكە سالايىق، 2024 جىلدىڭ 18 ماۋسىمىندا كييەۆتە وپپوزيسيالىق جۋرناليست، “باسە” ارناسىنىڭ اۆتورى ايدوس سادىقوۆقا قاستاندىق جاسالدى. ول باسىنان وق جاراقاتىن الىپ، 13 كۇن بويى جانساقتاۋ بولىمىندە جاتتى. 2 شىلدە كۇنى تۇندەقايتىس بولدى.
ۋكراينا باس پروكۋرورى كەڭسەسى بۇل قىلمىسقا قازاقستاننىڭ ەكى ازاماتىنىڭ قاتىسى بار ەكەنىن جەتكىزگەن ەدى.
ولار ايدوس سادىقوۆقا جاسالعان قاستاندىققا بايلانىستى كۇدىكتىلەرگە تاعىلعان ايىپتى "ادام ولتىرۋگە وقتالۋ" بابىنان "تاپسىرىس بويىنشا جانە توپ بولىپ ادامدى قاسانا ءولتىرۋ" بابىنا اۋىستىردى.
ۋكراينا قىلمىستىق كودەكسىندەگى "تاپسىرىس بويىنشا جانە توپ بولىپ ادامدى قاسانا ءولتىرۋ" بابىندا 15 جىلدان ءومىر بويىنا تۇرمە جازاسىنا كەسۋ ايىبى قاراستىرىلعان.
