Osylaisha Aidarbek Saparovtyń alǵashqy jumys kúni synaqpen bastaldy.
Petropavldaǵy sý jelisinde iri apat bolyp, qalanyń birneshe aýdany birer saǵatqa sýsyz qaldy.
Túnde óńir basshysy osy salaǵa jaýapty orynbasary Sátjan Ablalievpen baryp jaǵdaidy kózimen kórdi.
Bul jaiynda áleýmettik jelide ákimniń baspasóz qyzmeti habarlady.
Petropavlda ázirge sý berý tolyq qalpyna kelgen joq. Apat bolǵan aýdanda ótken túnde 15 kópqabatty úi men birneshe áleýmettik jáne kommertsiialyq nysandar sýsyz qalǵan edi.
Oqiǵa ornynda apattyq brigada túnimen jumys istep, alty úidegi jaǵdai qalypqa keldi. Qazirgi ýaqytta 600-den astam abonent sýsyz otyr.
– Jóndeý jumystary bir minýt ta toqtaǵan joq. Apattyń sebebi anyqtalady. Ázirge qubyrdyń jarylýyna naqty ne sebep bolǵanyn aitý qiyn. Eki qubyr qosylǵan jer sógilip ketken. Bul jerde byltyr jóndeý jumystary júrgizilgen edi. 100 mln teńgeden astam qarajat jumsaldy. Diametri 800 bolatyn 308 metr qubyr aýystyryldy. Shyǵyn kólemi ázirge belgisiz. Kepildik merzimi aiaqtalǵan joq. Sondyqtyn bizdiń jáne turǵyndardardyń shyǵynyn merdiger kompaniia óteitin bolady, – dedi «Qyzyljar Sý» JShS bas injeneriniń orynbasary Erbol Nábiev.
Esterińizge salaiyq, Petropavlda keshe saǵat 18.00 shamasynda sý jelisinde apat bolyp, qala turǵyndary sýsyz qalǵan edi.
