Búgin QR Mádenıet jáne aqparat mınıstri Aıda Balaevanyń qatysýymen Almatyda turatyn ádebıet pen óner qaıratkerlerine memlekettik stıpendıa tabystaldy, – dep habarlaıdy Dalanews.kz QR Mádenıet jáne aqparat mınıstrliginiń baspasóz qyzmetine silteme jasap.
Memleket basshysynyń ókimine sáıkes, 2024 jyly memlekettik stıpendıaǵa 75 adam ıe boldy.
Aıda Balaeva stıpendıa ıegerlerin quttyqtap, olardyń qazaq mádenıetin damytýǵa zor úles qosqanyn atap ótti. Mınıstr shyǵarmashylyq zıaly qaýym mádenı biregeılikti saqtaý, el birligin nyǵaıtý jáne ulttyq qundylyqtardy nasıhattaý isinde mańyzdy ról atqaratynyn aıtty.
«Prezıdent Qasym-Jomart Kemeluly Toqaevtyń ulttyq rýhanıat týraly únemi aıtyp, onyń eldik jolyndaǵy orasan kúshi men mol múmkindikterine qoǵamnyń nazaryn aýdaryp júrgeni málim.
Jyldaǵy halyqqa arnaǵan Joldaýlary, Ulttyq Quryltaıdaǵy bastamalary, túrli suqbattarynyń ózeginde – Táýelsizdik pen Otanshyldyq, Birlik pen Yntymaq, Ádildik pen Jaýapkershilik, Zań men Tártip, Jasampazdyq pen Jańashyldyq sıaqty búgingi Qazaqstanǵa aýadaı qajet qundylyqtar jatyr!
Halyqty birlikke shaqyrý, tatýlyqty nyǵaıtý, jas urpaqqa izgi qundylyqtardy sińirý – mine, bul siz ben bizdiń, ıaǵnı, zıaly orta men memlekettiń ortaq múddesi», – dedi mınıstr.
Aıda Balaeva Memleket basshysynyń barlyq bastamalary eń aldymen ult birligin qalyptastyrýǵa, memleketti nyǵaıtýǵa jáne azamattardyń ál-aýqatyn arttyrýǵa baǵyttalǵanyn atap ótti.
«Eldiktiń mártebesin arttyrýda ózderińizdeı mádenıet maıtalmandaryna, shyǵarmashyl qaýym ókilderine júkteler mindettiń de aýqymy zor. Árıne, osy jolda zıaly qaýym ókilderi Prezıdentimizge tirek bolyp, qashanda qoldaý bildiretindigine kúmánimiz joq. Eń bastysy – osy ıgi baǵytta judyryqtaı jumylyp, el múddesi úshin aıanbaı qyzmet etý. Memleket óz tarapynan mádenıet maıtalmandarynyń shyǵarmashylyǵyn qoldaýdy júıeli túrde jalǵastyra beredi», – dedi mınıstr.
Stıpendıa ıegerleri qatarynda Asanáli Áshimov, Bıbigúl Tólegenova, Oljas Súleımenov, Iranbek Orazbaev, Nurǵalı Núsipjan, Tuńǵyshbaı Jamanqulov, Merýert Ótekesheva, Amandos Aqanaev, Dýlat Isabekov, Tólen Ábdikuly, Tatána Tarskaıa, Gýlver Razıeva jáne basqa da kórnekti mádenıet qaıratkerleri bar.
