بۇگىن ق ر مادەنيەت جانە اقپارات ءمينيسترى ايدا بالايەۆانىڭ قاتىسۋىمەن الماتىدا تۇراتىن ادەبيەت پەن ونەر قايراتكەرلەرىنە مەملەكەتتىك ستيپەنديا تابىستالدى، – دەپ حابارلايدى Dalanews.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
مەملەكەت باسشىسىنىڭ وكىمىنە سايكەس، 2024 جىلى مەملەكەتتىك ستيپەندياعا 75 ادام يە بولدى.
ايدا بالايەۆا ستيپەنديا يەگەرلەرىن قۇتتىقتاپ، ولاردىڭ قازاق مادەنيەتىن دامىتۋعا زور ۇلەس قوسقانىن اتاپ ءوتتى. مينيستر شىعارماشىلىق زيالى قاۋىم مادەني بىرەگەيلىكتى ساقتاۋ، ەل بىرلىگىن نىعايتۋ جانە ۇلتتىق قۇندىلىقتاردى ناسيحاتتاۋ ىسىندە ماڭىزدى ءرول اتقاراتىنىن ايتتى.
«پرەزيدەنت قاسىم-جومارت كەمەل ۇلى توقايەۆتىڭ ۇلتتىق رۋحانيات تۋرالى ۇنەمى ايتىپ، ونىڭ ەلدىك جولىنداعى وراسان كۇشى مەن مول مۇمكىندىكتەرىنە قوعامنىڭ نازارىن اۋدارىپ جۇرگەنى ءمالىم.
جىلداعى حالىققا ارناعان جولداۋلارى، ۇلتتىق قۇرىلتايداعى باستامالارى، ءتۇرلى سۇقباتتارىنىڭ وزەگىندە – تاۋەلسىزدىك پەن وتانشىلدىق، بىرلىك پەن ىنتىماق، ادىلدىك پەن جاۋاپكەرشىلىك، زاڭ مەن ءتارتىپ، جاسامپازدىق پەن جاڭاشىلدىق سياقتى بۇگىنگى قازاقستانعا اۋاداي قاجەت قۇندىلىقتار جاتىر!
حالىقتى بىرلىككە شاقىرۋ، تاتۋلىقتى نىعايتۋ، جاس ۇرپاققا ىزگى قۇندىلىقتاردى ءسىڭىرۋ – مىنە، بۇل ءسىز بەن ءبىزدىڭ، ياعني، زيالى ورتا مەن مەملەكەتتىڭ ورتاق مۇددەسى»، – دەدى مينيستر.
ايدا بالايەۆا مەملەكەت باسشىسىنىڭ بارلىق باستامالارى ەڭ الدىمەن ۇلت بىرلىگىن قالىپتاستىرۋعا، مەملەكەتتى نىعايتۋعا جانە ازاماتتاردىڭ ءال-اۋقاتىن ارتتىرۋعا باعىتتالعانىن اتاپ ءوتتى.
«ەلدىكتىڭ مارتەبەسىن ارتتىرۋدا وزدەرىڭىزدەي مادەنيەت مايتالماندارىنا، شىعارماشىل قاۋىم وكىلدەرىنە جۇكتەلەر مىندەتتىڭ دە اۋقىمى زور. ارينە، وسى جولدا زيالى قاۋىم وكىلدەرى پرەزيدەنتىمىزگە تىرەك بولىپ، قاشاندا قولداۋ بىلدىرەتىندىگىنە كۇمانىمىز جوق. ەڭ باستىسى – وسى يگى باعىتتا جۇدىرىقتاي جۇمىلىپ، ەل مۇددەسى ءۇشىن ايانباي قىزمەت ەتۋ. مەملەكەت ءوز تاراپىنان مادەنيەت مايتالماندارىنىڭ شىعارماشىلىعىن قولداۋدى جۇيەلى تۇردە جالعاستىرا بەرەدى»، – دەدى مينيستر.
ستيپەنديا يەگەرلەرى قاتارىندا ءاسانالى ءاشىموۆ، بيبىگۇل تولەگەنوۆا، ولجاس سۇلەيمەنوۆ، يرانبەك ورازبايەۆ، نۇرعالي ءنۇسىپجان، تۇڭعىشباي جامانقۇلوۆ، مەرۋەرت وتەكەشيەۆا، اماندوس اقانايەۆ، دۋلات يسابەكوۆ، تولەن ابدىك ۇلى، تاتيانا تارسكايا، گۋلۆەر رازييەۆا جانە باسقا دا كورنەكتى مادەنيەت قايراتكەرلەرى بار.