Jumys barysynda óńir basshysy sonymen qosa, Óskemen qalasynyń onkologıa jáne hırýrgıa ortalyǵyn tekserdi. Búgingi kúni qurylys-montaj jumystary 95% oryndalǵan.
Aıta ketý kerek, jańǵyrtý jumystary onkologıalyq ortalyqtyń ekinshi korpýsynda júrgizilýde. Operasıalyq jáne Ortalyq zararsyzdandyrý bólimi birinshi qabattan besinshi qabatqa aýystyryldy. Ǵımarat úshin onkologıalyq aýrýlardy barynsha dál dıagnostıkalaýǵa múmkindik beretin 128 tilimge arnalǵan KT, «Signa Architect 3.0 T MRT» satyp alyndy.
Sondaı-aq, qazirgi ýaqytta bir tehnologıalyq bazany paıdalana otyryp, qashyqtyqtan sáýlelik terapıa men radıohırýrgıalyq aralasýlardyń barlyq túrlerin júrgizetin jelilik údetkishti ornatý boıynsha daıyndyq jumystary júrgizilýde.
Inspeksıa aıasynda Danıal Ahmetov nysan boıynsha birneshe eskertý jasady.
– Jalpy barlyq qurylys jumysy jaqsy júrip jatyr. Tek qabyrǵa panelderin qaıta jóndeý kerek. Olar ádette eshqandaı dybys shyǵarmaı, sapaly salynýy tıis. Medısınalyq birtekti lınoleým da dál solaı, ony da qaıta jasaý kerek. Naýryz aıynyń sońynda men taǵy bir tekserispen kelemin, – dedi D.Ahmetov.
Óńirdi damytýdyń keshendi baǵdarlamasy aıasynda Óskemendegi onkologıalyq ortalyqtyń 37 mamany álemniń úzdik onkologıalyq klınıkalarynda, atap aıtqanda: Ulybrıtanıa, Fransıa, Italıa, Izraıl, Túrkıada biliktiligin arttyrdy. Sondaı-aq, bıyl taǵy alty maman jelilik údetkishte jumys isteý boıynsha oqýdan ótedi.
