جۇمىس بارىسىندا ءوڭىر باسشىسى سونىمەن قوسا، وسكەمەن قالاسىنىڭ ونكولوگيا جانە حيرۋرگيا ورتالىعىن تەكسەردى. بۇگىنگى كۇنى قۇرىلىس-مونتاج جۇمىستارى 95% ورىندالعان.
ايتا كەتۋ كەرەك، جاڭعىرتۋ جۇمىستارى ونكولوگيالىق ورتالىقتىڭ ەكىنشى كورپۋسىندا جۇرگىزىلۋدە. وپەراسيالىق جانە ورتالىق زارارسىزداندىرۋ ءبولىمى ءبىرىنشى قاباتتان بەسىنشى قاباتقا اۋىستىرىلدى. عيمارات ءۇشىن ونكولوگيالىق اۋرۋلاردى بارىنشا ءدال دياگنوستيكالاۋعا مۇمكىندىك بەرەتىن 128 تىلىمگە ارنالعان كت، «Signa Architect 3.0 T مرت» ساتىپ الىندى.
سونداي-اق، قازىرگى ۋاقىتتا ءبىر تەحنولوگيالىق بازانى پايدالانا وتىرىپ، قاشىقتىقتان ساۋلەلىك تەراپيا مەن راديوحيرۋرگيالىق ارالاسۋلاردىڭ بارلىق تۇرلەرىن جۇرگىزەتىن جەلىلىك ۇدەتكىشتى ورناتۋ بويىنشا دايىندىق جۇمىستارى جۇرگىزىلۋدە.
ينسپەكسيا اياسىندا دانيال احمەتوۆ نىسان بويىنشا بىرنەشە ەسكەرتۋ جاسادى.
– جالپى بارلىق قۇرىلىس جۇمىسى جاقسى ءجۇرىپ جاتىر. تەك قابىرعا پانەلدەرىن قايتا جوندەۋ كەرەك. ولار ادەتتە ەشقانداي دىبىس شىعارماي، ساپالى سالىنۋى ءتيىس. مەديسينالىق بىرتەكتى لينولەۋم دا ءدال سولاي، ونى دا قايتا جاساۋ كەرەك. ناۋرىز ايىنىڭ سوڭىندا مەن تاعى ءبىر تەكسەرىسپەن كەلەمىن، – دەدى د.احمەتوۆ.
ءوڭىردى دامىتۋدىڭ كەشەندى باعدارلاماسى اياسىندا وسكەمەندەگى ونكولوگيالىق ورتالىقتىڭ 37 مامانى الەمنىڭ ۇزدىك ونكولوگيالىق كلينيكالارىندا، اتاپ ايتقاندا: ۇلىبريتانيا، فرانسيا، يتاليا، يزرايل، تۇركيادا بىلىكتىلىگىن ارتتىردى. سونداي-اق، بيىل تاعى التى مامان جەلىلىك ۇدەتكىشتە جۇمىس ىستەۋ بويىنشا وقۋدان وتەدى.
