Irannyń burynǵy prezidenti Mahmud Ahmadinejad memleket basshysyn sailaýǵa úmitker bola almady. Bul týraly irandyq aqparat quraldary habarlady.
2005-2013 jyldary prezident bolǵan Ahmadinejad 19 mamyrda ótetin prezidenttik sailaýǵa úmitker retinde tirkeldi. Degenmen ol Irannyń Sailaýlar ótkizý jónindegi shtaby jariialaǵan úmitkerler tizimine enbei qaldy.
Ahmadinejad syrtqy saiasatta konservativtik ustanymymen kózge tústi, ol Býsh ákimshiligin qatań synǵa aldy, Irannyń Reseimen jáne arab elderimen bailanysyn kúsheitýdi jaqtady. Buǵan qosa ol Izrail áreketterin synaýmen boldy. Ahmadinejad - Holokosty joqqa shyǵarýshylardyń biri.
Buǵan deiin aiatolla Áli Hamenei burynǵy prezident Ahmadinejadtyń sailaýǵa qatysýyna qarsy shyqqan edi.
Iranda 12-shi prezidenttik sailaý 19 mamyrda ótedi.
